08.10.2014 / 19:35

У Брэсце расіянін, які правозіў метамфетамін ва ўнітазе, атрымаў чатыры гады турмы

У Брэсце за незаконнае перамяшчэнне праз мяжу асабліва небяспечных псіхатропных рэчываў і іх незаконнае захоўванне асуджаны 33-гадовы непрацуючы жыхар Мурманскай вобласці Расіі.

Як паведаміў старшы пракурор аддзела пракуратуры Брэсцкай вобласці Генадзь Буры, 15 мая грамадзянін Расіі, які рухаўся праз пункт пропуску «Брэст-Цэнтральны» ў цягніку Прага - Санкт-Пецярбург, спрабаваў перамясціць праз мяжу набытыя ім у Чэхіі 7,15 грама рэчыва, якое змяшчае метамфетамін. Кантрабандыст схаваў яго ў прыбіральні вагона, прымацаваўшы скотчам да ўнутранай абшыўкі ўнітаза.

У пункце пропуску наркотык быў знойдзены і канфіскаваны. Жыхара Мурманскай вобласці затрымалі. У дачыненні да яго распачалі крымінальную справу. Пасля расеец быў узяты пад варту.

22 жніўня суд Ленінскага раёна Брэста прызнаў яго вінаватым па ч. 3 арт. 228 і ч. 1 арт. 328 КК і прысудзіў да пяці гадоў пазбаўлення волі ў калоніі ўзмоцненага рэжыму. У дачыненні да расіяніна была прыменена арт. 7 закона «Аб амністыі ў сувязі з 70-годдзем вызвалення Беларусі ад нямецка-фашысцкіх захопнікаў» і тэрмін пакарання ў выглядзе пазбаўлення волі ў калоніі ўзмоцненага рэжыму скарочаны на год.

Мужчына абскардзіў прысуд і прасіў прызначыць яму пакаранне ў выглядзе штрафу. 7 кастрычніка судовая калегія па крымінальных справах Брэсцкага абласнога суда пакінула скаргу без задавальнення, прысуд раённага суда — без змены. Ён уступіў у законную сілу.

Каб пакінуць каментар, калі ласка, актывуйце JavaScript у наладах свайго браўзеру