На гэтым усё. Нашы, на жаль, прайгралі - 0:2.
Мне тут падказваюць, што беларусы прынеслі на трыбуну даволі вялікі бел-чырвона-белы сцяг. Прабачце, не заўважыў.
92+
Узорна-паказальная контратака зборнай Украіны. І Сяргей Сідарчук павялічвае перавагу сваёй каманды - 0:2.
87-ая
Мартыновіча мяняюць на Савіцкага. Абаронцу на форварда.
84-ая
Часу, каб адыграцца зусім мала. Які крыўдны гол…
82-ая
Аўтагол. Беларусы забілі самі сабе. Аляксандр Мартыновіч - антыгерой моманта.
Украінцы пранеслі крыху піратэхнікі на сектар.
80-ая
На гульні прысутнічае 10 512 гледачоў.
77-ая
Нарэшце Кандрацьеў выпускае чыстага нападніка. Сяргей Карніленка замяніў Міхаіл Гардзейчука.
76-ая
Добры момант меў Стас Драгун, які біў з мяжы штрафной, але Пятаў пацягнуў.
У адной з наступных атак ва Украіны ледзь не атрымалася ўцекчы ў контратаку.
72-ая хвіліна
Фанацкая шыза сёння, канечне, на ўзроўні. У беларускім фан-сектары чалавек 1200, ва ўкраінскім - каля 800.
69-ая
У гульні зацішша. Слова зноў узялі фанаты. Тры суперпераклічкі сектароў. «Жыве Беларусь», «Слава Украіне», «Разам і назаўжды».
65-ая
Зноў абодва фан-сектары зацягнулі ўкраінска-беларускі хіт пра Пуціна. Прычым, на гэты раз ініцыятарамі былі беларусы. Ох, цікава, ці будуць якіясьці наступствы гэтаму.
62-ая
Дарэчы, у дзвюх іншых сустрэчах групы наспяваюць міні-сенсацыі. Славакія выйграе ў Іспаніі - 1:0. А Люксембург пакуль мацней Македоніі - 2:1.
55-ая
Беларусы ўсё актыўней пачынаюць пераходзіць на ўкраінскую палову поля. У цэлым можна сказаць, што нашы перахопліваюць ініцыятыву.
Пакуль пісаў гэтыя словы Юрый Жаўноў выратаваў Беларусь. Гульня ўсё яшчэ без забітых мячоў.
51-ая
Цікава, што ў першым тайме вырубілася табло на адзнацы 38 хвілін. У Беларусі была замена. Замест Стасевіча выйшаў Кісляк.
Нашы хлопцы мелі некалькі добрых момантаў у пачатку тайма.
46-ая хвіліна
Футбалісты выходзяць на поле. Пакуль тое, што адбываецца на трыбунах цікавей за падзеі на полі.
45-ая
Першы тайм скончыўся. Аляксандр Мартыновіч меў цудоўны момант адкрыць лік, але з ягоным ударам ва ўпор справіўся Пятаў. Першы тайм скончыўся - 0:0.
36-ая
Беларускі фан-сектар заспяваў «Не быць скотам».
А перад гэтым была проста ашаламляльная пераклічка «Разам і назаўжды». Беларусы гукалі «Разам», а ўкраінцы - «назаўжды».
35-ая
Прабачце, на стадыёне праблемы з нэтам. Таму не заўсёды аператыўна атрымліваецца выкладаць навіны.
Украінцы падціскаюць у гульнявым плане беларусаў. Нашы робяць стаўку на контратакі. Але абсалютна рэальных момантаў забіць не было ні ў тых, ні ў тых.
23-ая хвіліна
На полі пакуль нічога цікавага не адбываецца. Украінцы пакуль крыху актыўней.
Была прыгожая пераклічка: «Слава Украіне! Героям слава». А пасля фан-сектар гукаў «Жыве Беларусь». Здаецца, раней беларусы «Жыве Беларусь» дома гукаць не адважваліся.
15-ая хвіліна
Канаплянка небяспечна прастрэльваў у штрафную, але ніхто не змог замкнуць.
10-ая хвіліна
Паведамляюць, што на БТ выключылі інтэршум. Пакінулі толькі голас каментатара.
6-ая
Беларусы таксама гукаюць «Пуцін - ху…ло». Пакуль у гульнявым плане ўкраінцы актыўней.
5-ая
Пуцін - ху…ло! Нядоўга чакалі ўкраінскія фанаты.
3-ая хвіліна
Цяжка сказаць, які з фан-сектараў больш шматлікі. І там, і там па тысячы чалавек
1-ая хвіліна
Гульня пачалася. Усё яшчэ спяваюць «Воінаў света». Яшчэ аграмадны банер аб сяброўстве Беларусі і Украіны.
21:45
Фантастыка! Украінцы крычаць «Жыве Беларусі». Беларусы зацягнулі «Воіны света». Ух, спякотна на трыбунах!
21:44
Адгучалі гімны. Зараз пачнецца гульня.
21:36
Беларускі фан-сектар паказаў сваю магутнасць. Крычалі пакуль проста «Беларусь». Госці адказалі клічам - Украіна.
Зноў чуваць «Хто не скача, той маскаль». За трыбунамі будзе сачыць не менш цікава, чым за гульнёй.
21:32
Хлопцы з сектара Б-12 паведамляюць, што некаторых не хацелі прапускаць у бела-чырвоных шаліках. Прычым Пагоні ці бчб-сцяга там не было.
На сектары Б-12 расцяжка «Наперад, Беларусь».
21:30
Атмасфера на стадыёне даволі дружалюбная. Ніякай агрэсіўнасці не заўважыў.
Украінцаў прыехала ў Беларусь больш за тысячу чалавек.
21:27
Украінскія журналісткі дзівіліся надгляду, які праходзіў каля ўваходу ў прэс-цэнтр. Асабліва таму, што журналістаў просяць уключыць ноўтбук. А то раптам там бомба! Кажуць, што ва Украіне журналістаў ніхто ніколі не шманае. А мы ўжо звыкліся.
21:25
Стадыён пакуль амаль што пусты. Заўзятары як заўсёды вырашаюць прыйсці ў апошні момант, хоць і рызыкуюць не паспець да пачатку гульні.
Беларусь будзе гуляць з пяццю абаронцамі, хоць флангавыя Балановіч і Палякоў будуць актыўна падключацца ў атаку. У нападзенні нечакана выйшаў Міхаіл Гардзяйчук. Кандрацьеў працягвае здзіўляць.
21:21
Склады каманд.
Беларусь: Жаўноў, Мартыновіч, Філіпенка, Верхаўцоў, Балановіч, Палякоў, Драгун, Крывец, Стасевіч, Калачоў, Гардзяйчук.
Украіна: Пятаў, Кучар, Хачарыдзі, Фядзецкі, Шаўчук, Сцепаненка, Эдмар, Ротань, Ярмоленка, Зазуля, Канаплянка.
21:18
Уладзімір Навіцкі на стадыёне абвяшчае склады на беларускай і украінскай мовах. Яшчэ гучыць ангельская, а вось расійскай няма зусім.
Украінскі фан-сектар ужо паспрабаваў асцярожна пагукаць: «Хто не скача, той маскаль». Беларусы пакуль не асабліва падтрымалі.
***
Сёння на суперсучаснай нашай «Барысаў-Арэне» будуць гуляць зборныя Беларусі і Украіны. Матч пройдзе ў рамках адбору да чэмпіянату Еўропы па футболе.
Акрамя спартовага выніку, усіх цікавіць атмасфера на матчы. Беларуская міліцыя старанна адбірае ў заўзятараў любую нацыянальную сімволіку: Пагоні, бел-чырвона-белую атрыбутыку. Чаго, аднак, не адбярэш — гэта голасу.
Украінскія заўзятары на матчах апошнім часам скандуюць дзёрзкую крычалку пра набалелае, пра чалавека, які прынёс ва Украіну вайну — пра Пуціна. Ці асмеляцца падтрымаць іх беларусы? Што будуць скандаваць у Барысаве?
