13.10.2014 / 16:39

Больш як 80% іншаземцаў пасля наведвання Беларусі мяняюць меркаванне аб краіне ў лепшы бок 5

Пасля наведвання Беларусі больш за 80% іншаземцаў мяняюць сваё меркаванне аб краіне ў лепшы бок. Аб гэтым сведчаць вынікі апытання, праведзенага латвійскім рэкламным агенцтвам «AD Hunters Baltics».

Нясвіжскі замак. Ілюстрацыйнае фота.

«Грамадзяне краін Еўрасаюза, асабліва з Літвы, Латвіі, Германіі і Польшчы, пры наведванні Беларусі застаюцца ў захапленні ад парадку ў гарадах, цудоўных дарог, тэмпу развіцця гарадоў і маштабаў будаўніцтва. Гэта звязана з тым, што ў краінах Еўрасаюза інфармацыя аб Беларусі падаецца даволі аднабока і часта гаворыцца толькі аб яе праблемах, але не аб поспехах», — адзначыў старшыня праўлення агенцтва Кястуціс Ісакас.

Паводле яго слоў, больш актыўная работа па пашырэнні станоўчага іміджу Беларусі за мяжой магла б не толькі павялічыць паток турыстаў і ўмацаваць вобраз Беларусі як сучаснай, адкрытай і дружалюбнай дзяржавы, але і стаць каталізатарам для павелічэння замежных інвестыцый. У гэтым плане ён станоўча ацаніў эфект ад правядзення ў Мінску чэмпіянату свету па хакеі, які стаў цудоўнай рэкламай беларускай гасціннасці.

У апытанні латвійскага рэкламнага агенцтва прынялі ўдзел 546 чалавек з Літвы, Латвіі, Эстоніі, Фінляндыі, Польшчы і Германіі. Амаль трэць з іх прадпрымальнікі, якія былі прыемна задаволены інвестыцыйным кліматам у Беларусі і тым, што ў краіне створаны ўсе ўмовы для паспяховага бізнесу. «Простых турыстаў здзівілі поўныя паліцы ў магазінах і сучасныя супермаркеты, выдатная якасць беларускіх тавараў. Напрыклад, касметыкі, прадуктаў харчавання, адзення, будматэрыялаў. Адзінае, у чым Беларусь уступае пакуль краінам Еўрасаюза, гэта абслугоўванне ў сектары грамадскага харчавання. І, вядома, трэба больш актыўна працаваць у сферы грамадскіх адносін», — сказаў Кястуціс Ісакас.

«Hunters Communications group» - гэта міжнародная група агенцтваў маркетынгу і камунікацый, якая працуе ў Латвіі, Літве, Беларусі, Расіі і Эстоніі. Яна была створана ў 1993 годзе.

Хочаш падзяліцца важнай інфармацыяй ананімна і канфідэнцыйна?

0
Уладзімір Скрабатун / Адказаць
13.10.2014 / 17:26
«Грамадзяне краін Еўрасаюза, асабліва з Літвы, Латвіі, Германіі і Польшчы, пры наведванні Беларусі застаюцца ў захапленні ад парадку ў гарадах, цудоўных дарог, тэмпу развіцця гарадоў і маштабаў будаўніцтва. ========================================================== Толькі грамадзяне Еўрасаюза не ўлічваюць адну акалічнасць -- у нас народ працалюбівы і парадак у нас не толькі таму, што Аляксандр Рыгоравіч лётае над краінай на гелікоптары. Беларусы ўсё больш і больш пачуваюцца грамадзянамі незалежнай краіны. Я б паглядзеў, як бы, гіпатэтычна, Аляксандру Рыгоравічу дасталася б Пскоўская вобласць, дзе ўсё татальна запушчана. Ці даў бы ён там рады? Нават такі дробязны, здавалася б, факт -- альтанкі ўздоўж дарог. -- У нас бы ўсё пакралі, паламалі, спалілі б, -- дзівяцца расейцы. -- А ў вас ўсё стаіць і ніхто не ламае.
0
quechua / Адказаць
13.10.2014 / 17:45
а чаму ж 20% не змянілі меркаванне ў лепшы бок? можа ім замала БТ паказвалі?
0
Мікола ))) / Адказаць
13.10.2014 / 18:26
Краіна і рэжым (кіраўніцтва, эліта і г.д.) - розныя рэчы. Ваш кэп.
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру