16.10.2014 / 10:52

Памерла зорка фільма «Вялікая прагулка» — французская актрыса Мары Дзюбуа

Французская актрыса Мары Дзюбуа (сапраўднае імя Кладзін Люсі Палін Юзэ) памерла ў сераду, 15 кастрычніка, ва ўзросце 77 гадоў.

Уладальніц прэміі Сезар памерла ў паўднёва-заходнім французскім горадзе По, дзе з 2010 года пражывала ў доме састарэлых.

Дзюбуа нарадзілася ў Парыжы ў 1937 годзе. Пасля некалькіх роляў у п'есах яна з'явілася на тэлебачанні, дзе яе заўважыў Франсуа Труфо і запрасіў у свой фільм «Страляйце ў піяніста» (1960 год). Вядомасць прыйшла да яе не адразу. Яна грала як у аўтарскіх, так і папулярных фільмах («Жанчына ёсць жанчына» Жана-Люка Гадара, «Вялікая прагулка» Жэрара Уры).

Мары Дзюбуа са славутым комікам Бурвілем ў фільме «Вялікая прагулка» (1966).

Яна працавала з многімі папулярнымі рэжысёрамі і акцёрамі. У 1977 годзе актрыса атрымала прэмію Сезар за найлепшую ролю другога плана ў фільме «Пагроза» рэжысёра Алена Карно.

Дзюбуа стала менш здымацца ў кіно з канца 1970-х, калі ў яе выявілі рассеяны склероз. У 2007 годзе яна страціла свайго мужа і акцёра Сержа Русо, з якім яны разам выхавалі дачку Дамінік.

Каб пакінуць каментар, калі ласка, актывуйце JavaScript у наладах свайго браўзеру