У параўнанні з леташнім даследаваннем, паказчыкі якога былі пералічаныя, месца Беларусі не змянілася, паведаміла журналістам спецыяліст па развіцці прыватнага сектара групы Сусветнага банка Валянціна Салтане.
Паводле яе слоў, пералік леташніх паказчыкаў звязаны з унясеннем зменаў у метадалогію даследавання.
Разам з тым, падкрэсліла Салтане, у параўнанні з леташнім даследаваннем прыкметна палепшылася пазіцыя Беларусі па падаткаабкладанні. Калі ў пералічаным даследаванні Doing Business — 2014 Беларусь займала 107-е месца, то ў новым — 60-е.
Паляпшэнне пазіцыі Беларусі ў рэйтынгу па гэтым параметры аўтары даследавання тлумачаць укараненнем у краіне электроннай сістэмы выплаты падаткаў. «У Беларусі была праведзеная рэформа, якая ўкараніла электронную сістэму для выплаты падаткаў. Гэтая рэформа была рэалізаваная ў Беларусі ў 2012 годзе, аднак індыкатар па падаткаабкладанні, які разлічваецца ў межах даследавання, улічвае рэформу, калі сталі вядомыя вынікі яе правядзення», — растлумачыла Салтане.
Да моманту падрыхтоўкі Doing Business — 2015, удакладніла яна, паступіла інфармацыя пра тое, што «большасць прадпрыемстваў выкарыстоўваюць электронную сістэму выплаты падаткаў і што сістэма працуе без збояў». «У выніку рэформа была залічаная», — зазначыла Салтане.
Пры гэтым яна дадала, што іншых рэформ, якія маглі палепшыць рэйтынг Беларусі ў даследаванні, пры падрыхтоўцы Doing Business — 2015 заўважана не было. «Іншых рэформ, якія маглі б паўплываць на рэйтынг Беларусі, мы не змаглі зафіксаваць», — канстатавала Салтане.
Нагадаем, апошнімі гадамі беларускі ўрад неаднаразова заяўляў пра намер Беларусі ўвайсці ў трыццатку краін з найлепшымі ўмовамі вядзення бізнесу. З гэтай мэтай Саветам міністраў быў зацверджаны план дзеянняў па паляпшэнні ўмоў вядзення бізнесу ў краіне.
Даследаванне Doing Business ацэньвае якасць рэгулявання бізнесу ў 10 сферах, у якіх працуюць малыя і сярэднія прадпрыемствы. У прыватнасці даследаванне ахоплівае наступны пытанні: стварэнне прадпрыемстваў; атрыманне дазволу на будаўніцтва; рэгістрацыя ўласнасці; атрыманне крэдытаў; ахова правоў мінарытарных інвестараў; падаткаабкладанне; ажыццяўленне знешнегандлёвай дзейнасці.
