На Баранавіцкай швейнай фабрыцы больш за 10 дзён не выплачвалі заробак.
Фота Аляксандра Трыпуцькі.
Фота Аляксандра Трыпуцькі.
Фота Аляксандра Трыпуцькі.
Як паведамляе intex-press.by, раніцай 31 кастрычніка швачкі прадпрыемства сабраліся ля кабінета галоўнага інжынера, каб даведацца, калі яны атрымаюць сваю заработную плату. Па словах работніц, на гэтым тыдні яны амаль штодня патрабавалі выплаты заробку.
«У нас ужо пеня за квартплату пайшла, хто яе аплаціць? Нам трэба і крэдыты аплаціць, і за дзіцячыя садкі, за школу, а грошай нават на праезд няма!» — абураюцца швачкі.
Адміністрацыя заклікала работніц разысціся па працоўных месцах.
«Калі вы хочаце адзін з адным пагаварыць, то рабіце гэта на перапынку. Я раю дарабіць да канца змены. У панядзелак вы таксама павінны быць на працоўных месцах, каб не было прагулу. Нявыплата зарплаты не будзе падставай для таго, каб не залічыць прагул. Як толькі грошы паступяць, вы даведаецеся пра гэта першымі «, — заявіла галоўны інжынер фабрыкі Валянціна Тамашчук, якая выконвае абавязкі дырэктаркі, звольненай 24 кастрычніка «па ўзаемнай згодзе з інвестарам».
Па словах швачак, былая дырэктарка ў апошні дзень сваёй працы прайшлася па цэхах і паабяцала, што грошы будуць.
«Яна паўсміхалася, сказала, што грошы дадуць, а сама спакойна звольнілася і з'ехала. Нам штодзень абяцалі, што заробак будзе, а ўжо месяц заканчваецца», — абураюцца работніцы фабрыкі.
Паводле Валянціны Тамашчук, зарплату затрымалі з-за пакупкі новага абсталявання — спецыяльных пральных установак.
«Мы шылі рэчы, але не маглі праць іх перад адгрузкай, адгрузка затрымлівалася, грошай не было. Гэта доўжылася са жніўня, першыя партыі адгрузілі толькі 28 кастрычніка», — распавяла галоўны інжынер.
З-за цяжкай сітуацыі прадпрыемства заняло ў інвестара 1,5 млрд руб. (столькі трэба для выплаты заробкаў), але, паводле Валянціны Тамашчук, пры пералічэнні грошай узніклі праблемы з дакументацыяй.
«У гэтай сітуацыі сказаць, што людзі не маюць рацыю — нельга! Але і мы нічога не ў сілах зрабіць», — сказала Тамашчук.
Заробак працаўнікам швейнай фабрыкі выплацілі ў другой палове дня 31 кастрычніка.
Але швачкі маюць намер пісаць скаргу: «Мы не разумеем, хто нам плаціць, швейная фабрыка ці расійскі інвестар, на якога ўсе звальваюць віну і кажуць, што Расія грошай не дае. Ва ўсім гэтым трэба разабрацца».
Выданню «IP» звязацца з інвестарам не ўдалося.
