Сёння Аляксандр Лукашэнка прызначыў новага кіраўніка дзяржаўнага Мытнага камітэта. Ім стаў 47-гадовы Юрый Сянько.
Афіцыйная біяграфія гэтага чалавека не стракаціць фактамі. Нават не пазначаецца месца ягонага нараджэння. Паводле інфармацыі «Нашай Нівы»,
Юрый Сянько паходзіць з вёскі Варонча Карэліцкага раёна. Пра гэтую вёску ў «Зямлі пад белымі крыламі» згадваў Уладзімір Караткевіч, называючы музеем пад адкрытым небам.
Калі цікава болей даведацца пра радзіму новага старшыні Мытнага камітэта, то можаце паглядзець адмысловы выпуск перадачы «Падарожжы дылетанта» з Юрыем Жыгамонтам.
Вядома, што Юрый Сянько скончыў Гроденскі дзяржаўны ўніверсітэт імя Янкі Купалы, факультэт правазнаўства. Пасля чаго і застаўся на працы ў Гродне.
Займаў розныя пасады ў Гроденскай рэгіянальнай мытні. У 35 гадоў узначаліў Гродзенскую рэгіёнальную мытню. У 2011 Сянько перавялі кіраўніком Мінскай рэгіянальнай мытні. Праца ў Мінску больш адказная, істотна больш аб’ём працы.
«Хутка, якасна, з усмешкай на твары», - такія рэкамендацыі сваім калегам даваў Юрый Сянько.
Гродзенскі журналіст Андрэй Пачобут некалькі разоў сутыкаўся з Юрыем Сянько, калі апошні яшчэ працаваў у Гродне. «Гэта быў троху вальнейшы час, таму ён мог размаўляць з незалежнымі журналістамі, тады многія маглі сабе гэта дазваляць. За час ягонай працы многія супрацоўнікі Гродзенскай мытні апынуліся ў турме.
Але Мытны камітэт – гэта такая дзіўная структура, дзе правіны падначаленых ніяк не адбіваюцца на начальстве. Калі ў міліцыі, скажам, саджаюць супрацоўнікаў, то гэта вылазіць бокам і кіраўніцтву МУС, а вось у Мытным камітэце не так».
Пачобут адзначае, што Мытны камітэт – гэта ўсё ж не рэпрэсіўны орган, а структура, якая робіць усё, каб зарабіць больш грошай дзяржаве. Тым не менш, з імем Сянько звязаная адна не самая прыгожая гісторыя, калі ў 2006 годзе гродзенскія мытнікі, нібыта знайшлі наркотыкі ў аўтамабілі тагачаснай кіраўнічкі Саюза палякаў Анжалікі Борыс.
«Я не думаю, што гэта рабілася па загадзе Сянько, - працягвае Пачобут. – Адзінае, што ўзгадваю, дык гэта блытаніна ў ягоных словах, якія наркотыкі былі знойдзеныя, і афіцыйным паведамленнем на гэты конт». Дарэчы, тая справа ніякая працягу не мела. І проста была закрытая.
Што тычыцца былога кіраўніка, 61-гадовага Аляксандра Шпілеўскага, то гэты доўгажыхар ўладнага алімпа 13 гадоў ён узначальваў Мытны камітэт. Шпілеўскі выхадзец з КДБ.
Дзмітрый Лукашэнка хоча паставіць пад кантроль усе мабільныя тэлефоны11
Каментары