«Валерый Фралоў быў шчырым сябрам і чалавекам, верным сваім ідэалам»,
— адзначыў палітык Сяргей Скрабец з нагоды смерці генерала.
У 2000—2004 гадах Фралоў і Скрабец былі дэпутатамі палаты прадстаўнікоў Нацыянальнага сходу II склікання, уваходзілі ў апазіцыйную дэпутацкую групу «Рэспубліка». У чэрвені 2004 года Валерый Фралоў, Сяргей Скрабец і яшчэ адзін член групы «Рэспубліка» Уладзімір Парфяновіч аб'явілі галадоўку, патрабуючы ўнесці змены ў Выбарчы кодэкс, спыніць палітычныя рэпрэсіі і змяніць меру стрымання ў дачыненні да кіраўніка Беларускай асацыяцыі «Дзелавая ініцыятыва» Міхаіла Марыніча, які тады ўтрымліваўся ў СІЗА КДБ.
«Гэта рэдкі быў чалавек, бяссрэбранік, — успамінае Сяргей Скрабец. — Шкада, што не дажыў ён да светлай будучыні. Усё марыў, пачынаючы яшчэ з працы ў парламенце, палепшыць нашае грамадства. Не разумеў сённяшніх адносінаў, калі ўсё — за грошы і чалавек чалавеку — воўк. Ён быў не такім, заўсёды за ўсіх перажываў, дапамагаў».
Скрабец расказаў, што сустракаўся з Фраловым некалькі дзён таму. «Цяжка паверыць, што ён памёр. Нядаўна бачыліся з ім, ён быў бадзёры і поўны сіл. Мы абмяркоўвалі прэзідэнцкую кампанію. Валерый Іванавіч планаваў вылучаць сваю кандыдатуру. Мы пачалі ўжо збіраць ініцыятыўную групу, быў план дзеянняў, сустрэч і гэтак далей. Ён жа быў стратэгам, у яго ўсё было строга паводле плана», — сказаў Скрабец.
Генерал Фралоў памёр у Мінску 10 лістапада на 68-м годзе жыцця. Яго знайшоў мёртвым у кватэры сын. Паводле слоў сына, «дакладная прычына смерці пакуль невядомая, але па знешніх прыкметах сказалі, што або тромб, або інфаркт».
