Рабочыя, звольненыя з Бабруйскага завода трактарных дэталяў і агрэгатаў (БЗТДіА), атрымалі адказ на свой ліст, адрасаваны кіраўніку дзяржавы, з адміністрацыі прадпрыемства.
16 кастрычніка дзевяць членаў пярвічнай арганізацыі Свабоднага прафсаюза БЗТДіА звярнуліся з адкрытым лістом да Аляксандра Лукашэнкі. Яны абвінавацілі дырэктара завода Аляксандра Аграновіча ў падрыве эканамічнага стану дзяржавы, бо той звальняе высокакваліфікаваных работнікаў, праследуючы іх з-за прыналежнасці да Свабоднага прафсаюза.
Жаданне данесці інфармацыю аб сітуацыі на заводзе да кіраўніка дзяржавы і стала прычынай галадоўкі чатырох звольненых рабочых — Мікалая Жыбуля, Алега Шаўчэнкі, Аляксандра Варанкіна і Аляксандра Грамыкі. Галадоўка, нагадаем, пачалася 5 лістапада.
«Амаль месяц мы чакалі адказу і, нарэшце, яго атрымалі. З адміністрацыі прэзідэнта ліст адправілі на МТЗ (БЗТДіА уваходзіць у склад вытворчага аб'яднання «МТЗ» — БелаПАН.), МТЗ спусціў яго на наш завод. У выніку яны нам адпісаліся, што ўсё нармальна: мы вас аптымізавалі, чаго вы ад нас хочаце?»
— сказаў Мікалай Жыбуль.
Паводле яго слоў, у лісце адміністрацыя БЗТДіА сцвярджае, што звальненне рабочых не звязанае з іх членствам у Свабодным прафсаюзе, бо прыблізна ў той жа час было звольнена яшчэ 60 чалавек. «Гэта ўсё надуманае. У нас на заводзе велізарная цякучасць, а зарплаты маленькія», — пракаментаваў Жыбуль.
Сённяшні дзень галадоўкі, мабыць, стане апошнім.
Хаця на здароўе ніхто з удзельнікаў акцыі пратэсту не скардзіцца, сэнсу працягваць галадоўку яны не бачаць, бо, як адзначыў Жыбуль, на іх скаргу, пасланую кіраўніку дзяржавы, «адказалі тыя, на каго скардзіліся».
Нагадаем, 12 лістапада Аляксандр Грамыка і Мікалай Жыбуль пабывалі на прыёме ў старшыні Бабруйскага гарвыканкама Андрэя Каваленкі, які таксама адмовіўся вырашаць пытанне іх аднаўлення.
«Ніхто з іх нават не паспрабаваў унікнуць у праблему, прыслухацца да простых людзей. Мы ж не займаемся ніякай палітыкай, мы простыя працавікі, спрабавалі знайсці справядлівасць у гэтай краіне, аказалася — яе няма. Я адпрацаваў 30 гадоў без нараканняў, а мне далі выспятка, нібыта так і павінна быць»,
— сказаў Жыбуль.
Цяпер звольненыя рабочыя рыхтуюць выніковы зварот, а на 16.00 14 лістапада яны выкліканыя позвамі ў міліцыю. У позвах указана, што іх выклікаюць для складання пратаколаў аб адміністрацыйным правапарушэнні (правядзенні несанкцыянаванай акцыі).
