У пракуратуры Мінскай вобласці прааналізаваны прычыны рэзкага росту ў гэтым годзе падлеткавай злачыннасці ў рэгіёне. 

Як паведаміла пракурор аддзела па наглядзе за выкананнем заканадаўства аб непаўналетніх і моладзі абласной пракуратуры Таццяна Зянькова,

за дзевяць месяцаў 2014 года зарэгістраваны 342 злачынствы, што на 79, ці на 30%, больш, чым за аналагічны перыяд 2013 года. Са 189 да 238, ці на 26%, павялічылася колькасць удзельнікаў злачынстваў. 

Адной з асноўных прычын росту злачыннасці непаўналетніх у пракуратуры бачаць слабую арганізацыю працы органаў і ўстаноў, упаўнаважаных на ажыццяўленне прафілактыкі безнагляднасці і правапарушэнняў непаўналетніх. Вырашальная роля ў гэтай працы належыць органам выканаўчай улады, у тым ліку камісіі па справах непаўналетніх. 

У пракуратуры ўказваюць, што пагаршэнне крымінальнай абстаноўкі ў падлеткавым асяроддзі адбылося шмат у чым з-за недахопаў і недаглядаў у працы міліцыі, перш за ўсё фармалізму, бессістэмнасці, слабай прафесійнай падрыхтоўкі супрацоўнікаў, асабліва ІСН, нізкага і нерэгулярнага ведамаснага кантролю.

Не забяспечаны належны ўзровень узаемадзеяння і абмену інфармацыяй паміж службамі і падраздзяленнямі міліцыі. 

Ёсць недахопы і недагляды ў працы ўстаноў адукацыі. Выхаваўчая праца з навучэнцамі часцей за ўсё праводзіцца па фактах учынення імі супрацьпраўных дзеянняў і не заўсёды з'яўляецца выніковай. Недастатковы ўдзел устаноў адукацыі па раннім выяўленні дзяцей, схільных да асацыяльных паводзінаў, а таксама якія знаходзяцца ў сацыяльна небяспечным становішчы. 

Не на належным узроўні арганізавана ўзаемадзеянне ўстаноў аховы здароўя з іншымі суб'ектамі прафілактыкі па пытаннях папярэджання правапарушэнняў непаўналетніх, звязаных з незаконным абаротам наркотыкаў. У шэрагу выпадкаў прафілактычная праца з непаўналетнімі, якія ўжываюць алкаголь, наркотыкі, носіць фармальны характар, не выконваюцца тэрміны і перыядычнасць прафілактычных аглядаў асоб названай катэгорыі. 

Звесткі аб занятасці дзяцей у пазаўрочны час не заўсёды адпавядаюць рэальнаму становішчу спраў. Ёсць недахопы ў працы па арганізацыі вольнага часу ў сельскай мясцовасці.

У гэтай сувязі не эфектыўны ўплыў органаў выканаўчай улады розных узроўняў на дзейнасць устаноў і арганізацый у сферы вольнага часу падлеткаў. 

Выклікаюць трывогу пракуратуры факты самавольных сыходаў дзяцей з інтэрнатных устаноў і з сем'яў, а таксама адсутнасць узаемадзеяння паміж праваахоўнымі органамі і зацікаўленымі службамі па інфармаванні аб гэтых фактах і іх папярэджанні.

Хочаш падзяліцца важнай інфармацыяй ананімна і канфідэнцыйна?