18.12.2014 / 15:50

Курс продажу даляра скокнуў да 11 500 рублёў, у многіх абменніках няма валюты Пішыце ў каментах, якая сітуацыя ў Вашым горадзе, раёне 26

Галоўная тэма для абмеркавання ў Мінску – імклівы рост курсаў валют. Нягледзячы на заявы Аляксандра Лукашэнкі пра тое, што «дэвальвацыі не будзе», беларусы перастрахоўваюцца і пераводзяць свае ашчаджэнні ў даляры.

У аддзяленні «Беларусбанка» на вуліцы Калініна ў чарзе сабралася каля 20 чалавек, большасць альбо закрывае рублёвы дэпазіт, каб набыць валюту, альбо адразу купляе валюту. Каля 12:00 даляры і еўра скончыліся, з таго часу прадаецца толькі здадзеная валюта.

Падобная сітуацыя і ў «Беларусбанку» на праспекце Незалежнасці каля плошчы Перамогі. Чарга кліентаў выходзіць за межы аддзялення, грошы ў банкамаце скончыліся.

Інтэрнэт-карыстальнікі паведамляюць пра адсутнасць валюты ў многіх абменніках. Там, дзе даляры ёсць у продажы, іх курс моцна адрозніваецца ад афіцыйнага.

У большасці абменнікаў «Беларусбанка» пасля абеда курс быў узняты да 11 490 рублёў. «Банк Масква-Мінск», «БелВЭБ», «БСБ Банк» прадаюць даляры па 11 500 рублёў. Рэкардсмен – «Абсалютбанк» з 11 600 рублямі.

Яшчэ ўчора раніцай амерыканскую валюту можна было свабодна набыць па 11020-11050 рублёў. Такім чынам за суткі курс фактычна вырас на 4%.

Нацбанк не рэагуе на змены на валютным рынку ніяк. Афіцыйны курс даляра па-ранейшаму прырастае на 10 рублёў штодзень, заўтра ён будзе складаць 10890 рублёў.

Розніца паміж афіцыйным курсам і курсам у абменніках дасягае 6,5%, сітуацыя блізкая да ўтварэння двух паралельных курсаў.

Ягор Марціновіч, фоты Кірылы Хілька

0
Аляксандр / Адказаць
18.12.2014 / 16:05
Зато вместе с Россией😊
0
Алег / Адказаць
18.12.2014 / 16:14
НН, ты нарвешся. Зачыняць цябе. Якога ляду паніку наводзіш? Аб'ектыўна канстатуеш факты? Нікому твая аб'ектыўнасьць ня трэба. Я ледзь сам не рвануў толькі што набываць валюту.
0
Мікола / Адказаць
18.12.2014 / 16:18
зноў "народзец" падводзіць
Паказаць усе каментары/ 26 /
Каб пакінуць каментар, калі ласка, актывуйце JavaScript у наладах свайго браўзеру