03.01.2008 / 08:38

Беларускі футбаліст падпісаў кантракт зь нямецкім "Гамбургам"

Назіральная рада "Гамбургу" ўхваліла набыцьцё ў менскага "Дынама" паўабаронцы моладзевай зборнай Беларусі 20-гадовага Антона Пуцілы.

Назіральная рада "Гамбургу" ўхваліла набыцьцё ў менскага "Дынама" паўабаронцы моладзевай зборнай Беларусі 20-гадовага Антона Пуцілы. Зьдзелка абышлася нямецкаму клюбу ў 500 тыс. эўра. На гэтым тыдні футбаліст павінен прыбыць у новы клюб, а ўжо 7 студзеня ён адправіцца з асноўным складам "Гамбургу" на збор у Дубаі.

Галоўны трэнер Хууб Стэвэнс ахарактарызаваў Пуцілу як "маладога талента". Антон зрабіў на яго добрае ўражаньне, калі ў лістападзе — сьнежні тры тыдні знаходзіўся на праглядзе ў клюбе. І гэта нягледзячы на тое, што Пуціла ў асноўным працаваў з аматарскай і другой камандай, а з асноўнай правёў толькі некалькі трэніровак.

"Трэнер нашага рэзэрву Карстан Бэран быў ад яго ў захапленьні! Ды й ў трэніроўцы зь першай камандай ён добра сябе паказаў. Пуціла – атакуючы гулец, гатовы гуляць з глыбіні. Ён валодае добрай тэхнікай, хуткасьцю і бачаньнем поля. Зь яго можа вырасьці добры футбаліст ", — цытуе "Bild" словы Хууба Стэвэнса. На пытаньне, ці зможа Пуціла дапамагчы асноўнаму складу камнады ўжо ў другім крузе, галоўны трэнер быў больш асьцярожны: "Цяжка сказаць, ён мне нагадвае 17-гадовага нігерыйца Маколі Крысантуса, якога мы падпісалі ў лістападзе. За такімі хлопцамі будучыня «Гамбурга»: калі мы ўжо заключаем зь імі кантракты, то павінны даваць ім шанец".

Зараз у чэмпіянаце Нямеччыны перапынак, у турнірнай табліцы першынства бундэслігі "Гамбург" займае трэцяе месца пасьля "Баварыі" і "Вэрдэра".

Каб пакінуць каментар, калі ласка, актывуйце JavaScript у наладах свайго браўзеру