Удзельнікі мітынга ў Дрэздэне трымаюць нацыянальныя сцыягі. Фота Reuters.

Больш за 17.000 чалавек прынялі ўдзел ў панядзелак у мітынгу ў нямецкім Дрэздэне, спяваючы калядкі і крытыкуючы ўрад за празмерную лагоднасць да мігрантаў з ісламскіх краін, паведаміла агенцтва Reuters.

Мітынгі, якія арганізуе рух PEGIDA (Патрыятычныя еўрапейцы супраць ісламізацыі Захаду), праводзяцца штопанядзелак. Учорашні стаў дзясятым запар і самым буйным.

Аналагічныя, але не такія вялікія акцыі праводзяцца актывістамі руху, якія арганізуюцца праз інтэрнэт, і ў іншых гарадах Нямеччыны.

Апаненты называюць акцыі PEGIDA ксенафобскімі і непрымальнымі для краіны. Прадстаўнікі руху, да якога ў асноўным далучаюцца звычайныя немцы, адмаўляюць гэтыя абвінавачанні.

У маніфесце руху абвяшчаецца неабходнасць абараняць хрысціянска-юдэйскую культуру і талерантнага стаўлення да стрыманых муслімаў, якія гатовыя прыняць нямецкі лад жыцця. У той ж час ісламізм абвяшчаецца ідэалёгіяй гвалту і ненавісці да жанчын.

Рух паўстаў у Дрэздэне пасля таго, як у сацыяльных сетках з'явіліся заклікі пратэставаць супраць стварэння ў раёне горада 14 дадатковых цэнтраў прытулку для уцекачоў.

Прыкладна 200.000 новых імігрантаў прыбылі ў Нямеччыну ў гэтым годзе, у значнай частцы гэта сірыйцы, якія бягуць ад грамадзянскай вайны.

Хочаш падзяліцца важнай інфармацыяй ананімна і канфідэнцыйна?