Верныя народным традыцыям, карэспандэнты БелаПАН, як і многія суграмадзяне, кожны год хаваюць пад навагоднюю ёлку сюрпрызы для дамашніх. І, натуральна, самі таксама прадчуваюць нейкія прыемныя нечаканасці да Дзеда Мароза. Мы вырашылі пацікавіцца ў прахожых на мінскіх вуліцах, а што б яны паклалі пад ёлку кіраўніку дзяржавы, калі б з'явілася такая магчымасць?
Вось некаторыя з адказаў:
«Цукерачку».
«Я — яму? Нічога б не паклаў. Прэзідэнт абяцаў нам умацаваць беларускі рубель падчас апошняй перадвыбарнай кампаніі. Вы бачыце, як ён яго ўмацоўвае».
«Праект скейт-парка ў Беларусі».
«Напэўна, пагадненне паміж Расіяй і Украінай».
«Нейкую цацку яго сыну — баранчыка напрыклад».
«Гэта павінна быць нешта духоўнае, бліжэй да сэрца? Каб ён расплюшчыў вочы, паглядзеў на неба і ўбачыў там Бога».
«У яго, напэўна, усё ёсць. Акрамя залатога батона нейкага».
«Каб нас не забываў, нам таксама пад ёлку што-небудзь паклаў».
«Дранік паклаў бы».
«Вентыль вялікі падарыў бы, каб газ і нафту можна было ўключаць-адключаць — спатрэбілася б дакладна».
«Сто баксаў на хлябок».
«Шмат грошай і ірысак».