За першыя дні гэтага года на дарогах Гомельскай вобласці загінуў адзін і траўмаваныя чатыры пешаходы. Ва усіх выпадках кіроўцы ўцяклі з месца аварыі.
Як паведамілі ва ўпраўленні ДАІ УУС Гомельскага аблвыканкама, 2 студзеня ў Калінкавічах 36-гадовы кіроўца аўтамабіля «Мерседэс-Бэнц» учыніў наезд на пешахода 1985 года нараджэння, які рухаўся па краі праезнай часткі. Ад атрыманых траўм пешаход памёр на месцы ДТЗ. Кіроўца з месца здарэння ўцёк, але на працягу гадзіны быў затрыманы супрацоўнікамі ДАІ. У дачыненні да яго распачата крымінальная справа.
У Гомелі 1 студзеня 48-гадовы кіроўца аўтамабіля «Поршэ-Каен» учыніў наезд на маладога чалавека 1994 года нараджэння, які ляжаў на праезнай частцы. Апошні з траўмамі змешчаны ў бальніцу хуткай дапамогі. Кіроўца з месца здарэння таксама ўцёк і не паведаміў пра ДТЗ у міліцыю. На наступны дзень яго асобу ўстанавілі супрацоўнікі ДАІ.
У навагоднюю ноч у 01.34 у Рагачоўскім раёне кіроўца аўтамабіля «Нісан-Альмера» ўчыніў наезд на жанчыну 1974 года нараджэння, якая пераходзіла праезную частку па нерэгуляваным пешаходным пераходзе. Жанчына атрымала траўмы, кіроўца з месца ДТЗ уцёк, але быў затрыманы ў суседнім Буда-Кашалёўскім раёне ў выніку плана «Перахоп».
У Рагачове ў навагоднюю ноч 20-гадовы малады чалавек, не маючы права кіравання машынай, на аўтамабілі «Хундай-Акцэнт» учыніў наезд на 30-гадовага пешахода, якія стаяў пасярэдзіне праезнай часткі. Пешаход атрымаў траўмы, кіроўца і ў гэтым выпадку ўцёк. Яго асобу ўстанавілі таксама ў выніку плана «Перахоп».
