10.01.2015 / 09:55

Мова наша. Калавур, Калаўр ці Калаур?  28

З прызначэннем новага старшыні Нацбанка паўстала пытанне, як яго правільна пісаць па-беларуску. Калавур, Калаўр ці Калаур? Ёсць пытанні і да націску. КалаУр ці КалАур?

Варыянт 1. Калаур

Такую форму выкарыстоўвае сайт Нацбанка і іншых афіцыйных структур, а таксама дзяржаўныя газеты і інфармагенцтва БелТА. Як патлумачылі ў Нацбанку, менавіта так запісвае сваё прозвішча сам старшыня, запаўняючы дакументы па-беларуску.

Аднак гэты варыянт памылковы. Пасля галоснай «у» мусіць змяняцца, слова няма сярод выключэнняў.

Варыянт 2. Калавур

Гэтая форма слушная, калі націск падае на «у» - КалавУр. Тады ўзнікае прыстаўны гук «в».

Чытач «Нашай Нівы» з Берасцейшчыны даслаў скан свайго пашпарту. У ім прозвішча па-беларуску напісана як «Калавур», па-руску — «Каллаур».

А на Піншчыне, напрыклад, ёсць вёска Калавуравічы. Такая шыльда вісіць у яе пачатку.

Варыянт 3. Калаўр

Родныя старшыні Нацбанка, размаўляючы з карэспандэнтамі «НН» прамаўлялі прозвішча з націскам на другі склад — «КалАўр». У такой сітуацыі прыстаўны зычны з'яўляцца не будзе, затое, паводле агульнага правіла, «у» пераходзіць у «ў», патлумачылі нам у Інстытуце мовазнаўства Акадэміі навук.

Такім чынам, існуюць два варыянты гэтага прозвішча з рознымі націскамі і напісаннем: КалавУр, і КалАўр. Паколькі ў сям'і і на радзіме старшыні Нацбанка ўжываюць другі варыянт, то будзем так пісаць і мы. А афіцыйным СМІ і Нацбанку раім па-беларуску пісаць з «у» кароткім.

Ягор Марціновіч

0
кіяскёр / Адказаць
10.01.2015 / 10:06
Гэты Еўпацій Калаўрат яшчэ наробіць дзялоў у НБ.Чуе маё сэрца.
0
змагарам / Адказаць
10.01.2015 / 10:17
Рэд. У ЕГУ больш беларускай мовы, чым у любым з дзяржаўных універсітэтаў.
0
змагарам / Адказаць
10.01.2015 / 10:27
Рэд. Калi ласка, падрабязней аб "бел мове"..................... Рэд. Беларуская мова практычна выціснутая з дзяржаўных універсітэтаў. На сёння па-беларуску выкладаюць толькі на беларускамоўных аддзяленняў філфакаў, на палове патоку гістфака і асобныя выкладчыкі ў розных універсітэтах (у БДУ некаторыя выкладчыкі фізікі і вышэйшай матэматыкі, у ГДУ -- права, у Медыцынскім -- асобныя спецыяльнасці і г.д.) па сваёй ініцыятыве. У краіне таксама няма ніводнага тэлеканала па-беларуску, ніводнага тэлеканала для дзяцей па-беларуску і г.д. У кабельных сетках, змест якіх вызначае дзяржава, дзясяткі каналаў па-расейску і ніводнага - па-беларуску, забаронены адзіны такі існы, уласна, - Белсат. Хоць вялікая доля грамадзян аддае перавагу беларускай мове, за 20 гадоў кіравання Лукашэнкі быў толькі адзін міністр і ніводнага генерала, якія б аддавалі перавагу беларускай мове. У выніку перапісы зафіксавалі падзенне долі людзей, якія гавораць па-беларуску дома, з 37 да 23 працэнтаў. Гэта бадай сусветны рэкорд асіміляцыі адной нацыі другой.
Паказаць усе каментары/ 28 /
Каб пакінуць каментар, калі ласка, актывуйце JavaScript у наладах свайго браўзеру