Сайт AirlineRatings.com склаў рэйтынг самых бяспечных авіяліній для 2015 года. На думку спецыялістаў, аўстралійская кампанія Qantas займае першае месца. Агулам у спісе прадстаўлена 449 кампаній, у тым ліку low-cost перавозчыкі.
У першую дзесятку таксама ўваходзяць Air New Zealand, British Airways, Cathay Pacific Airways, Emirates, Etihad Airways, EVA Air, Finnair, Lufthansa і Singapore Airlines.
Рэйтынг AirlineRatings.com прымае пад увагу цэлы шэраг фактараў, звязаных з аўдытам ад органаў авіяцыі, такіх як FAA і ІКАО, а таксама дзяржаўных праверак і статыстыкі смяротнасці. Максімальная магчымая адзнака — сем зорак. Для прыкладу, беларуская Belavia мае толькі пяць зорак.
Рэдактары AirlineRatings.com таксама вызначылі сваю дзясятку самых бяспечных бюджэтных авіякампаній. Яны размешчаны ў алфавітным парадку: Aer Lingus, Alaska Airlines, Icelandair, JetBlue, Jetstar, Kulula.com, Monarch Airlines, Thomas Cook, TUI Fly і WESTJET.
У адрозненне ад шэрагу нізкабюджэтных перавозчыкаў, гэтыя авіякампаніі адпавядаюць строгім крытэрам Operational Safety (IOSA) Міжнароднай асацыяцыі паветранага транспарту і маюць выдатныя паказчыкі бяспекі.
З 449 авіякампаній 149 маюць сем зорак, але амаль 50 маюць усяго тры зоркі або менш. Пяць авіякампаній атрымалі толькі адну зорку за бяспеку ад AirlineRatings.com. Да іх адносяцца: Agni Air, Kam Air, Nepal Airlines,Scat і Tara Air.
У выпушчаным прэс-рэлізе таксама адзначаецца, што 2014 год можа лічыцца не самым удалым для грамадзянскай авіацыі —агулам у 21 катастрофе загінула 986 чалавек.
Гэта горшы паказчык за апошнія 10 гадоў. Тым больш мінулы 2013-ы лічыцца самым бяспечным годам для авіацыі: тады загінулі 265 чалавек. Але варта адзначыць, што колькасць перавезеных пасажыраў дасягнула адзнакі ў 3.3 млрд, а агульная колькасць рэйсаў наблізілася да 27 мільёнаў. Для параўнання, 50 год таму ў 87 катастрофах загінула 1597 чалавек, але агульная лічба пасажыраў тады была толькі 141 млн. Гэта 5% ад сённяшняй.
