Працоўны кабінет канцлера Германіі Ангелы Меркель выглядае незвычайна сціпла: на недарагім стале толькі тэлефоны, манітор, візітоўніца, лямпа і глобус. Ніякіх табе пазалочаных прэс-пап'е, якімі застаўленыя кабінеты постсавецкіх кіраўнікоў дзяржаў.
Не адрозніваецца раскошай і залатым аздабленнем і кабінет Барака Абамы. На самай справе прэзідэнт ЗША ва ўсім вядомым Авальным кабінеце працуе вельмі рэдка. Яго рэальнае працоўнае месца нашмат сціплейшае.
А вось новы кабінет Лукашэнкі ў Палацы Незалежнасці абстаўлены з шыкам. Тут і агромністыя люстры, і каштоўная мэбля, і вялікі тэлевізар. І нават 21-цалевы Apple з бесправадной клавіятурай.
Не абвінаваціш у сціпласці і Пуціна. У прэзідэнта Расіі — некалькі кабінетаў, але ўсе яны выглядаюць прыкладна аднолькава. Іх выгляд дае зразумець, што Уладзімір Пуцін зусім не просты чалавек.
Раскошны кабінет дастаўся ў спадчыну ад Януковіча і цяперашняму прэзідэнту Украіны Пятру Парашэнку. На масіўным стале — малахітавы пісьмовы прыбор, пазалочаны пясочны гадзіннік і таршэр з мармуровай ножкай, з тэхнікі — стацыянарны кампутар і невялікі планшэт Apple.
