У Мінску 19 студзеня адбыўся суд па пазове міліцыянта да блогеркі за слова «мент».
Лена Стогава, stogova.livejournal.com
Супрацоўнік УУС Мінскага метрапалітэна Ігар Дунько падаў у суд на блогерку Алену Мельнікаву (псеўданім — Лена Стогава) за абразу службовай асобы пры выкананні ім службовых паўнамоцтваў. Міліцыянта пакрыўдзілі ў пасце блогеркі словы «мент», «мянтоўская краіна» і «ненавіджу вас ўсёй душой», якія ён прыняў на свой рахунак.
Увечары 3 снежня 2014 года Алену Мельнікаву не прапусцілі ў метро супрацоўнікі аховы на станцыі «Парк Чалюскінцаў». Яны палічылі, што дзяўчына выпіла лішняга.
Згодна з правіламі мінскага метрапалітэна, праезд пасажыраў у алкагольным ап'яненні не дапускаецца. Алена сцвярджае, што яна была цвярозай. І ў той вечар была згодная прайсці медыцынскі агляд, аднак супрацоўнікі метро ёй адмовілі.
Пазней дзяўчына апісала інцыдэнт на сваёй старонцы ў «Жывым журнале». Пост называўся «Сёе-тое пра маю мянтоўскую краіну». Блогерка, у прыватнасці, пісала: «Ну, вядома, я не п'яная. І нават не выпіла! Госпадзе, якое недарэчнае апраўданне. Чаму я павінна сцвярджаць адваротнае? Яны не хацелі экспертызу. Яны проста вырашылі, што так трэба. І я нават не прывыкла аб такім пісаць — гэта звычайная справа ў нас.
Не пусціць мяне ў метро. У маёй краіне, у маім родным горадзе. Дзе я плачу падаткі, якія перавышаюць бюджэт любога дзіцячага дома. Не пусцілі! Ганьба вам, таварышы. Шчыра вамі пагарджаю. Усёй душой. Мая краіна мне мілая, пакуль я не бачу гэтыя твары. Сілавікі. Мянты, лайдакі. Бяспека краіны… Ненавіджу вас, «абаронцы айчыны»! Так і ведайце. О, Госпадзе, а як зрабіць так, каб ніколі вас не бачыць?»
16 студзеня Мельнікаву запрасілі ва УУС Мінскага метрапалітэна, дзе яна і даведалася, што прапаршчыка Ігара Дунько так закранулі яе словы, што ён вырашыў звярнуцца ў суд.
У блогу Алена Мельнікава не называла канкрэтнага супрацоўніка аховы, таксама не называла імёнаў міліцыянтаў. Аднак яна размясціла фота супрацоўнікаў міліцыі ў метро, сярод якіх быў і прапаршчык Дунько.
19 студзеня справа разглядалася ў судзе Кастрычніцкага раёна Мінска, працэс вёў суддзя Аляксандр Сяргей. Сутнасць пазову — артыкул 23.5 КаАП (абраза службовай асобы пры выкананні ёй службовых паўнамоцтваў). Заслухаўшы бакі, суд вынес пастанову прызнаць вінаватай блогерку Стогаву (Мельнікаву) і прызначыць ёй штраф у 20 базавых велічынь. Адвакат адказчыка Сяргей Хмылко паведаміў, што бок мае намер абскардзіць рашэнне суда першай інстанцыі.
Бок абароны настойвае, што дадзены пост у інтэрнэце быў выразам думкі блогеркі, а не абразай канкрэтнай асобы.
Акрамя таго, Алена Мельнікава адмаўляе два каментары, якія таксама ставіліся ёй у віну, а менавіта словы «яны бязмозглыя пешкі, якія жывуць за мае падаткі», «мае падаткі кормяць гэта тлустае мянтоўскае цела».
Пацярпелы Ігар Дунько заявіў, што запіс блогеркі яго абразіў. У дачыненні да яго праводзілася службовая праверка, сваякі і знаёмыя ўспрынялі, што ён няварты супрацоўнік. Прапаршчык больш за 20 гадоў адпрацаваў у сістэме МУС, дысцыплінарных спагнанняў не меў.
Алена Мельнікава — PR-спецыялістка і блогерка. Працавала прэс-сакратаркай на «Беларусьфільме», журналісткай дзяржаўных тэлеканалаў, уваходзіла ў прэзідэнцкі пул.
