Мікалаю Статкевічу не змянілі рэжым адбыцця пакарання.

Аб гэтым ён паведаміў у лісце сваёй жонцы Марыне Адамовіч. На думку адміністрацыі шклоўскай калоніі, ён «не стаў на шлях выпраўлення».»16 студзеня выклікалі на камісію па замене рэжыму. Гэта праводзіцца без усялякіх заяў ад арыштантаў — калі тэрмін прыйдзе, — піша Статкевіч. — Вынік чаканы, але здзівіла фармулёўка.

Я «не стаў на шлях выпраўлення», таму што «не ўдзельнічаў у працы самадзейных арганізацый» і «ўхіляўся ад грамадскай працы». 

«Безумоўна, на такі шлях я не стаў, бо невінаватаму чалавеку гэта без патрэбы.

А вось як у адзіночцы весці «грамадскую працу» і «ўдзельнічаць у арганізацыях» — гэта пытанне», — іранізуе аўтар ліста. 

Экс-кандыдат у прэзідэнты Беларусі Мікалай Статкевіч адбывае пакаранне па прыгаворы суда Ленінскага раёна Мінска, які ў маі 2011 года прыгаварыў яго да шасці гадоў пазбаўлення волі па абвінавачанні ў арганізацыі масавых беспарадкаў у дзень прэзідэнцкіх выбараў 19 снежня 2010 года. 

Першапачаткова асуджаны ўтрымліваўся ў шклоўскай калоніі № 17, аднак у студзені 2012 года яму ўзмацнілі жорсткасць умоў адбыцця пакарання — адміністрацыя калоніі палічыла, што Статкевіч «не стаў на шлях выпраўлення», «да ўмоўна-датэрміновага вызвалення не імкнецца» і пасля адбыцця пакарання мае намер «весці злачынны лад жыцця».

Фармальнай падставай для гэтых абвінавачанняў стала адсутнасць на адзенні Статкевіча біркі з нумарам зняволенага, а таксама тое, што ён не ўказаў у спісе асабістых рэчаў насоўкі. 

Статкевіча перавялі на тры гады ў магілёўскую турму № 4, адкуль 12 студзеня гэтага года ён вярнуўся ў шклоўскую калонію № 17. 

Некалькі дзён таму стала вядома, што Мікалаю Статкевічу забаранілі доўгатэрміновае спатканне са сваякамі на падставе двух рапартаў аб парушэнні правілаў унутранага распарадку, якія ён нібыта ўчыніў у першыя два дні знаходжання ў шклоўскай калоніі. Паводле інфармацыі жонкі палітыка, першы рапарт быў складзены за неўстаноўленую форму адзення.

Статкевіч быў апрануты ў штаны, выдадзеныя яму ў магілёўскай турме. Другі рапарт — у сувязі з тым, што за 15 хвілін да адбою асуджанага не было на спальным месцы. 

Пяцідзесяцівасьмігадовы Мікалай Статкевіч — адзіны кандыдат у прэзідэнты Беларусі на выбарах 2010 года, які дагэтуль знаходзіцца ў зняволенні. Яму неаднаразова прапаноўвалі напісаць прашэнне аб памілаванні на імя Аляксандра Лукашэнкі, але ён катэгарычна адмаўляецца гэта рабіць.

Міжнародныя праваабарончыя арганізацыі прызналі Мікалая Статкевіча палітычным зняволеным.

Хочаш падзяліцца важнай інфармацыяй ананімна і канфідэнцыйна?