28.01.2015 / 12:03

Грэцыя дэзавуявала заяву ЕС з асуджэннем абстрэлу Марыупаля 38

Такое здарылася першы раз у гісторыі Еўрасаюза.

Заява Еўрасаюза з асуджэннем абстрэлу баевікамі Марыупаля з'явілася ў аўторак, 27 студзеня, уранку. А ўвечары ўрад Грэцыі выдаў камунікат, у якім адмежаваўся ад дадзенай заявы.

У ім гаворыцца: «Дадзеная заява з'явілася ў абыход належнай працэдуры, згодна з якой павінна быць атрыманая згода ўсіх краін і, у прыватнасці, не была атрыманая згода Грэцыі».

«У такім кантэксце Грэцыя не пагаджаецца на дадзеную заяву».

Заяву рыхтаваў офіс Дональда Туска.

Вынікі выбараў у Грэцыі былі абвешчаныя ў панядзелак, а ўрад быў сфармаваны ў аўторак. Гэта дало падставу дыпламатычнаму прадстаўніцтву Грэцыі ў ЕС паспрабаваць разрадзіць сітуацыю, патлумачыўшы, што непаразуменне было звязанае проста з перадачай улады ў Афінах.

Учора Цыпрас размаўляў з каардынатаркай еўрапейскай дыпламатыі Федэрыкай Магерыні.

Як паведамляе інфармаванае брусэльскае выданне euobserver.com, грэкі спрабавалі выдаліць з заявы радок, якім адказнасць за бамбаванне ўскладалася на Расію. «Размыць заяву таксама спрабавалі Аўстрыя, Венгрыя і Славаччына, — піша сайт. — Але ім не ўдалося».

У выніку да заявы дадалі спасылку пра асаблівую пазіцыю Грэцыі.

У Еўрасаюзе рашэнні прымаюцца кансэнсусам. Таму радыкальна левы ўрад Грэцыі зможа блакаваць любыя рашэнні ЕС, скіраваныя на стрымліванне расійскага наступу ва Украіне ці на абарону правоў чалавека ў Беларусі.

У Еўрапарламенце Сірыза ўваходзіць у еўрапейскі блок «Еўрапейскія левыя». Лідар Сірыза Алексіс Цыпрас нават быў кандыдатам ад гэтага згуртавання на пасаду кіраўніка Еўракамісіі. А Еўрапейскія левыя традыцыйна выступаюць супраць санкцый да Расіі за яе агрэсію ва Украіне. Яны ўскладаюць віну за падзеі ў Крыме і Данбасе на цэнтральны ўрад Украіны.

Таксама левыя галасавалі супраць абмежавальных мераў у дачыненні да лукашэнкаўцаў за парушэнні правоў чалавека ў Беларусі. Галоўны вораг для еўрапейскай радыкальнай лявіцы — гэта ЗША і правыя сілы ў Еўропе. У змаганні з імі яны гатовыя яднацца нават з дыктатарамі. Чавэс — кумір еўрапейскіх левых, а Пуцін — надзея на змену статус-кво на сусветнай палітычнай арэне. Некаторыя з палітычных сілаў, што ўтварылі Сірызу, атрымлівалі фінансаванне з Масквы яшчэ ў савецкія часы.

Палітолагі не даюць рады прадказаць, як будуць разгортвацца падзеі пасля перамогі Сірызы. У палітычных колах Германіі не выключалі варыянту выхаду Грэцыі з еўразоны і Еўрасаюза ўвогуле — першы такі выпадак у гісторыі ЕС.

Большасць аналітыкаў у самой Грэцыі дапускаюць, што пасля прыходу да ўлады Сірыза не будзе выконваць большасці перадвыбарных абяцанняў і працягне выкананне патрабаванняў міжнародных крэдытораў, каб утрымацца ў еўразоне. Дзве траціны грэкаў хочуць захавання еўра. Галасаванне за Сірызу — пратэстнае па сваім характары.

Камуністы і радыкалы ўваходзілі ва ўрадавыя кааліцыі ў еўрапейскіх краінах і раней. Гэта здаралася ў Францыі пры Франсуа Мітэрану, у Італіі ў 1990—2000-я. Гэта не прывяло да дэзінтэграцыі ЕС, але накладвала адбітак на палітыку саюза. Розніца ў тым, што Сірыза — самая радыкальная палітычная сіла, якая калі-кольвек прыходзіла да ўлады ў краіне ЕС. Акрамя таго, Грэцыя — праваслаўная краіна, а аслаблення Еўрасаюза дабіваецца Крэмль. 

Варта адзначыць, што склад урада Цыпраса дае надзею, што Грэцыя захавае праеўрапейскі выбар. Ключавыя пасады ў МЗС, Мінфіне і Мінабароны занялі праеўрапейскія дзеячы.

Сяргей Гезгала

0
Анцiк / Адказаць
28.01.2015 / 12:07
чакана
0
FN SCAR-L / Адказаць
28.01.2015 / 12:16
Деньги,деньги, и ещё раз деньги, кремль на подкуп их не жалеет,так как и ссср,а левые деньги всегда любили хоть и не признавались.
0
вобразна / Адказаць
28.01.2015 / 12:16
Грэцкі предвадзіцель пачынае нагадваць Шарыкава, які сядзіць на аршынах і сталуецца задарам, але і лісты-даносы на свайго ўтрымальніка строчыць. Цікава, скончыцца як у рамане?
Паказаць усе каментары/ 38 /
Каб пакінуць каментар, калі ласка, актывуйце JavaScript у наладах свайго браўзеру