Упраўленне «К» пры Міністэрстве ўнутраных спраў Беларусі і Аператыўна-аналітычны цэнтр пры прэзідэнце адказалі на зварот Беларускай асацыяцыі журналістаў (БАЖ) з нагоды блакіроўкі інтэрнэт-сайтаў у снежні 2014 года.
22 снежня БАЖ накіравала ў Генеральную пракуратуру, Упраўленне МУС па раскрыцыі злачынстваў у сферы высокіх тэхналогій (упраўленне «К») і Аператыўна-аналітычны цэнтр пры прэзідэнце афіцыйныя лісты, у якіх ставілася пытанне аб незаконнай блакіроўцы сайтаў belapan.com, belapan.by, naviny.by, belaruspartisan.org, udf.by, 21.by, gazetaby.com, zautra.by, charter97.org.
У адказе ААЦ, які размешчаны на сайце БАЖ, адзначаецца, што гэты орган не распачынаў меры па абмежаванні доступу да ўказаных сайтаў. Акрамя таго, паводле інфармацыі, прадстаўленай ААЦ аператарамі, збояў у працы абсталявання сетак перадачы даных, а таксама кропкі абмену нацыянальным трафікам і міжнароднага цэнтра камутацыі 19 снежня 2014 года не зафіксавана.
«Разам з тым указанымі аператарамі 19 снежня зафіксавана масіраваная атака на сетку перадачы даных. Паводле атрыманай інфармацыі, распачатыя захады абароны не паўплывалі на даступнасць указаных у звароце інтэрнэт-сайтаў», — указвае ААЦ.
МУС, у сваю чаргу, прапануе адрасаваць пытанні з нагоды блакіроўкі сайтаў Дзяржаўнай інспекцыі па электрасувязі Мінсувязі і інфарматызацыі. «У сувязі з тым, што ў гэтых падзеях адсутнічае грамадская небяспека, а таксама склад адміністрацыйнага правапарушэння ці крымінальнага злачынства, праверка па Вашым звароце спыненая», — паведамляе ўпраўленне «К».
Генпракуратура раней адказала, што не ініцыявала пытанняў, звязаных з абмежаваннем доступу да ўказаных сайтаў, паведамляе прэс-служба БАЖ.
