Карабель Драпежнікаў церпіць катастрофу на Зямлі. Зьняволеныя Чужыя вызваляюцца і атакуюць жыхароў амэрыканскага мястэчка. А прыбылы Драпежнік-ахоўнік палюе на легендарных істотаў – дый на людзей. Ці выжыве чалавек, калі б’юцца монстры?
Чарговая эксплюатацыя культавых страхоцьцяў, пазбаўленая ўцямнага сцэнару й новых адмысловых эфэктаў. Пра ідэі асаблівыя гаварыць таксама не выпадае, але ў карціне братоў Строз ёсьць настальгічная музыка, старыя “чужынскія” гукі і некалькі годных сцэнаў. Гэта паказаная на хвілю плянэта Драпежнікаў – попельна-чырвоная, грувасткая, змрочная; наіўна-нахабны кадар Чужога над калыскаю зь немаўлятамі.
Выкарыстоўваньне пачвараю парадзіхаў, кісьліня ад Драпежніка, што зьнішчае сьляды, гібрыд Чужога з Драпежнікам, атамны выбух – збольшага ліхаманкава-асьцярожныя, плагіятна-штучныя і сапсаваныя апэратарам.
Параўноўваць фільм з шэдэўрамі Кэмерона і Скота ніяк нельга, але Чужынска-Драпежніцкая тэма яшчэ ня вычарпаная.
Фільм толькі для заўзятараў жудаснае фантастыкі.