Ва ўчорашнім выпуску у газэце «Савецкая Беларусь — Беларусь сёньня» быў надрукаваны на цэлую паласу рэпартаж Зьмітра Бартосіка зь Беласточчыны, які зьявіўся тыдзень таму на сайце Радыё Свабода.
Тэкст перакладзены на расейскую мову.
Праграма Зьмітра Бартосіка з сэрыі «Падарожжы Свабоды» прысьвечаная тэрору з боку Арміі Краёвай у адносінах да праваслаўнага насельніцтва, які адбываўся ў 1940-я гады на Беласточчыне. У рэпартажы Бартосік размаўляе зь мясцовымі жыхарамі пра падзеі таго часу.
Даведаўшыся пра публікацыю на старонках газэты Адміністрацыі прэзыдэнта, Зьміцер Бартосік вельмі зьдзівіўся:
«Больш за 10 гадоў я вандрую па беларускіх вёсках, дзе даю магчымасьць старым выказаць усё, што набалела. За гэтыя гады былі расказаныя дзясяткі гісторый пра злачынствы савецкіх партызан, нямецкіх салдат, супрацоўнікаў НКВД, акупацыйных паліцэйскіх. Але чамусьці менавіта гэты матэрыял быў уганараваны ўвагаю «Беларусі сегодня». Ці не таму толькі, што крывапійцамі і нелюдзямі выступаюць палякі?»
Бартосік прапануе рэдакцыі «Савецкай Беларусі» перадрукаваць іншыя матэрыялы з цыклю «Падарожжы Свабоды»,
«А што ж яны не перадрукуюць матэрыял пра Багданаў ці пра Сакалоўку? Ці не таму, што тэма партызанскіх злачынстваў — табу ў «СБ»? Бо там і месца дзеяньня Беларусь і ўсе дзейныя асобы — беларусы».
Зьміцер Бартосік
