21 лютага пачынаюцца заняткі ў Акадэміі вэб-адукацыі Беларускага дзяржаўнага ўніверсітэта.
Праект распрацаваны супрацоўнікамі механіка-матэматычнага факультэта БДУ. Трохузроўневая праграма навучання прызначана для вучняў 7—11-х класаў і студэнтаў ВНУ. Залічэнне ў акадэмію слухачоў старэйшага ўзросту арганізатары пакуль не разглядаюць.
Першы ўзровень акадэміі — «Праца карыстальніка ў інтэрнэце» — з'яўляецца базавым. Тут слухачоў навучаць працы ў глабальнай сетцы з нуля, дапамогуць сфарміраваць навыкі эфектыўнага пошуку інфармацыі ў інтэрнэце.
Другі — «Дызайн і праектаванне сайтаў» — прадугледжвае навучанне пабудове кліенцкіх сайтаў. Запланавана таксама вывучэнне камп'ютарнай графікі для вэб-сайтаў, асноў вэб-дызайну, праектавання і распрацоўкі сайтаў.
На трэцім узроўні — «Вэб-тэхналогіі» — слухачы змогуць атрымаць прафесійныя веды па асновах стварэння вэб-дадаткаў, камп'ютарных размеркаваных тэхналогій, PHP, Java.
Як паведаміў загадчык кафедры вэб-тэхналогій і камп'ютарнага мадэлявання БДУ Валерый Раманчык, сярод асноўных мэт акадэміі — «ліквідацыя інтэрнэт-неадукаванасці, барацьба з гульнявой залежнасцю, падрыхтоўка годных спецыялістаў». «Інтэрнэт-адукаванасць, ці «новая адукаванасць», ахоплівае ўсе бакі жыцця ў інфармацыйным грамадстве: уменне замовіць білет, правесці аплату праз глабальную сетку, трапіць у музей ці бібліятэку, паглядзець пэўны фільм, патэлефанаваць бясплатна», — адзначыў Раманчык.
Мала хто са студэнтаў і школьнікаў сёння не карыстаецца інтэрнэтам, аднак многія гэта робяць метадам тыку, дадаў загадчык кафедры, «узровень ведаў і разумення застаецца вельмі нізкім».
«Студэнтам і школьнікам можа падацца, што матэрыял, які мы збіраемся падаваць на першай ступеньцы навучання ў акадэміі, ім ужо вядомы. Аднак мы не хацелі б пераводзіць слухачоў на другі этап без ліквідацыі камп'ютарнай неадукаванасці. Паколькі, як паказвае практыка, школьнікі інтэрнэтам валодаюць недастаткова добра», — падкрэсліў ён.
Што датычыцца гульнявой залежнасці, то барацьба з ёй будзе ажыццяўляцца «шляхам больш глыбокага навучання». «Энергія і інтэлект будуць перанакіраваныя на іншыя цікавыя рэчы», — растлумачыў Раманчык.
Паводле яго слоў, праграма акадэміі адрозніваецца ад іншых аналагічных адукацыйных праектаў у першую чаргу тым, што яна з'яўляецца аўтарскай. Заняткі ў акадэміі будуць весці выкладчыкі кафедры вэб-тэхналогій і камп'ютарнага мадэлявання БДУ пры падтрымцы навучальнага цэнтра механіка-матэматычнага факультэта.
Плануецца, што заняткі будуць праходзіць па суботах і доўжыцца тры акадэмічныя гадзіны. Працягласць кожнага семестра складзе 48 гадзін. Кошт аднаго семестра — 810 тысяч рублёў.
На сайце дыстанцыйнага навучання акадэміі слухачы змогуць знайсці прапушчаны матэрыял самастойна, а таксама выканаць практычныя і дамашнія работы.
Пасля заканчэння слухачам будзе выдавацца дакумент, які пацвярджае праходжанне адукацыйнага курса. «Хутчэй за ўсё, гэта будуць дыпломы павышэння кваліфікацыі, аднак да канца гэтае пытанне яшчэ не прапрацавана», — адзначыў Валерый Раманчык.
