Мілінкевіч падкрэсліў, што ўсе беларускія дэмакратычныя сілы «разам адстойваюць права беларусаў жыць у дэмакратыі і незалежнай краіне».
«Дэмакратыя абавязкова прыйдзе, але сёння для нас галоўнае — абараніць незалежнасць, бо яе можна страціць за адну ноч, і тады не будзе ні свабоды, ні правоў чалавека, ні Радзімы», — сказаў Мілінкевіч.
Паводле яго слоў, дэмакратычныя сілы выступаюць за дыялог унутры краіны. «За тое, каб палітычная дыскусія перадусім вялася не на вуліцах і плошчах, а ў міжнародна прызнаным беларускім парламенце», — адзначыў Мілінкевіч.
Палітык падкрэсліў, што дэмакратычныя сілы таксама выступаюць за дыялог з ЕС: «Дыялогу няма альтэрнатывы. Але ён павінен будавацца на празрыстых прынцыпах, прагматычных адносінах з захаваннем павагі да каштоўнасцяў. Могуць быць цыклы прагрэсу і рэгрэсу, але Еўропа не павінна гаварыць: «Не хочаце з намі — да спаткання!» Трэба спрыяць лібералізацыі і росту еўрааптымізму як грамадзян, так і ўлад нашай краіны. Найважнейшае — захаваць тут «смак Еўропы».
Паводле слоў Мілінкевіча, дыялог можа дапамагчы правесці ў Беларусі сумленныя выбары. «Нам вельмі важна, каб беларускія парламентарыі як роўныя з роўнымі былі прадстаўленыя ў Еўранесце, — сказаў ён. — Сёння мы прапаноўваем кампрамісны варыянт «5+5» (палова дэлегацыі ад Палаты прадстаўнікоў, палова — ад грамадзянскай супольнасці). Ёсць надзея, што выбары ў наш парламент у 2016 годзе пройдуць ужо адкрыта, справядліва, мы палічым галасы разам з уладамі — і ў гэтай зале Беларусь будзе прадстаўляць паўнацэнная дэлегацыя».
Мілінкевіч дадаў: «Мы таксама вітаем запрашэнне афіцыйнай беларускай дэлегацыі на Рыжскі саміт Усходняга партнёрства ў маі, але лічым, што на ім павінен быць пачуты голас грамадзянскай супольнасці і беларускай апазіцыі».
17—18 сакавіка ў Ерэване праходзіць чацвёртае пленарнае пасяджэнне Парламенцкай асамблеі Усходняга партнёрства (Еўранест). У пасяджэнні рабочай групы па Беларусі Еўрапарламента напярэдадні ўдзельнічалі прадстаўнікі сямі апазіцыйных структур Беларусі: лідары Беларускай партыі левых «Справядлівы свет» Сяргей Калякін, Беларускай сацыял-дэмакратычнай партыі (Грамада) Ірына Вештард, руху «За Свабоду» Аляксандр Мілінкевіч, кампаніі «Гавары праўду» Уладзімір Някляеў, АГП Анатоль Лябедзька, намеснік старшыні Партыі БНФ Рыгор Кастусёў і сустаршыня аргкамітэта па стварэнні партыі «Беларуская хрысціянская дэмакратыя» Віталь Рымашэўскі.
