Фота: ncdalliance.org
Выпрабаванні новага прэпарату кампаніі Biogen Idec пад назвай адуканумаб на 166 пацыентах даюць надзею хворым на Альцгеймера, распавядае Forbes.
Прэпарат па выніках першых выпрабаванняў значна скараціў колькасць атэрасклератычных бляшак у сасудах галаўнога мозгу пацыентаў і запаволіў пагаршэнне кагнітыўных функцый.
Пацыентам прызначаліся выпадковыя дозы лекаў, таксама даваліся «пустышкі», каб адсеяць эфект Плацэба (выпадак, калі пацыент кажа аб паляпшэнні стану за кошт адной толькі веры ў лекі).
Тыя, хто прымалі «пустышку», за год заўважна пагоршылі свае вынікі ў кагнітыўных тэстах (на 2-3 балы па 30-бальнай шкале). Тыя жа, хто прымаў сапраўдны прэпарат, за год «развучыліся» менш. Пры гэтым чым большай была доза, тым лепшымі былі вынікі.
Лекары чакалі зніжэнне эфекту хваробы Альцгеймера на 20-30%, але ў першых выпрабаваннях эфекты паслаблі на 70%.
У лекаў выяўленыя і пабочныя эфекты, сярод якіх анамаліі, што могуць прывесці да ацёку мозгу. Як сцвярджае Biogen, ацёк не выклікае сімптомаў і можа змяншацца са змяншэннем дозы, але большасць лекараў лічыць такі эфект непрымальным.
Выпрабаванні адуканумабу будуць працягвацца, больш маштабныя тэсты кампанія плануе правесці ўжо ў гэтым годзе.
Адуканумаб ёсць першым прэпаратам, які паказаў эфект адначасова і ва ўплыве на сасуды галаўнога мозгу, і ў запавольванні страты кагнітыўных функцый.
***
Часцей за ўсё ад хваробы Альцгеймера церпяць старэйшыя за 65 год. На 2010 год колькасць хворых на Альцгеймера ацэньвалася ў 21-35 млн чалавек па ўсім свеце. Пасля пастаноўкі дыягназу хворы пражывае ў сярэднем 7 год.
Сярод сімптомаў на ранняй стадыі расстройства кароткачасовай памяці, з цягам часу хворы губляе і доўгачасовую памяць, арыентацыю ў прасторы, здольнасць звязана размаўляць, не можа даглядаць за сабой.
Прычыны хваробы на сёння да канца не даследаваныя, сучасныя метады лекавання могуць адно змякчаць сімптомы.
