Уладзімір Грозаў: Мітрапаліт Павел публічна паабяцаў мяне пасадзіць
Былы кіраўнік праваслаўнага выдавецтва не прызнае сваёй віны.
Заведзена крымінальная справа на былога дырэктара выдавецтва Беларускага экзархата Уладзіміра Грозава. Фігурант – постаць асаблівая. Ён прыйшоў у царкву з сілавых структур і 16 гадоў кіраваў выдавецтвам экзархата.
«Былы 55-гадовы кіраўнік, злоўжываючы службовымі паўнамоцтвамі, арганізаваў крадзеж грашовых сродкаў у падначаленага выдавецтва. Ён наўмысна аддаваў незаконныя распараджэнні падначаленым работнікам аб штомесячным знішчэнні дакументаў пярвічнага ўліку таварна-матэрыяльных каштоўнасцяў і грашовых сродкаў, а таксама незаконна забіраў з касы прадпрыемства наяўныя грашовыя сродкі. Далей грошы фігурант выкарыстаў для набыцця за мяжой грузавога і легкавога аўтатранспарту», — паведамілі ў ГУУС Мінгарвыканкама.
Размова ідзе пра 14 адзінак тэхнікі на агульную суму большую за $150 тысяч. Па версіі следства, аўтамабілі афармляліся на Грозава або яго сваякоў.
Паўнамоцтвы Уладзіміра Грозава ў выдавецтве былі прыпынены яшчэ ў кастрычніку 2014 года. Мітрапаліт Павел публічна паведаміў, што Сінадальная рэвізійная камісія Беларускага экзархата «прызнала дзейнасць Грозава нездавальняючай». Грозава не вызвалілі з падзякай, а ганебна звольнілі.
Расследаванне крымінальнай справы, заведзенай Генеральнай пракуратурай, працягваецца.
«Наша Ніва» звязалася з Уладзімірам Грозавым.
«У сувязі з тым, што ў мяне была забраная справа, у якую я цягам 16 гадоў укладаў усе свае сілы, сродкі і душу, працуючы на карысць праваслаўнай асветы, здароўе маё рэзка пагоршала. Цяпер займаюся яго аднаўленнем», — паведаміў «Нашай Ніве» ён.
«НН»: Вы не прызнаеце сваёй віны?
УГ: Катэгарычна не.
«НН»: Каму і для чаго трэба Вас абгаворваць?
УГ: На жаль, ва ўсіх публічных асоб ёсць нядобразычліўцы і зайздроснікі.
«НН»: Міліцыя назвала суму ў $150 тысяч і 14 машын, якія на гэтыя грошы былі куплены за мяжой. Адкуль узніклі такая сума і гэтая тэхніка?
УГ: Сумы крадзяжу, агучаныя ў СМІ, і з’яўляюцца вынікам беспадстаўных абвінавачванняў з боку чыноўнікаў Епархіі БПЦ, якія праследуюць свае карыслівыя мэты.
«НН»: Як даўно вядзецца расследаванне?
УГ: Прыкладна з кастрычніка праводзіцца праверка па ініцыятыве БПЦ.
«НН»: Праўда, што мітрапаліт Павел публічна паабяцаў Вас пасадзіць?
УГ: Так. Але я шчыра спадзяюся, што гэта не асабістая ініцыятыва першай асобы БПЦ, а вынік нахабных паклёпаў нядобразычліўцаў Епархіі ды іншых асоб, якія намагаюцца атрымаць татальны кантроль над дзейнасцю па духоўнай асвеце, якая рэалізуецца мной па сродках грамадскіх арганізацый.
«Забіць яго ці адрэзаць яму яйцы я не рашыўся». Падрабязнасці трагедыі ў Гданьску, дзе ваяр катаваў бойфрэнда, а пасля забіў сябе45
Каментары