24.03.2015 / 22:59

Журы літаратурнай прэміі «Дэбют» прыняло нечаканае рашэнне ФОТАРЭПАРТАЖ 11

Пераможцамі сёлета сталі Палачанскі і Нядбай. Кожны з лаўрэатаў атрымаў чэк на 30 млн рублёў.

24 сакавіка ў філіяле Дзяржаўнага музея гісторыі беларускай літаратуры «Літаратурны музей Максіма Багдановіча» ў Мінску прайшло ўручэнне прэміі для маладых пісьменнікаў «Дэбют». Пераможцамі ў намінацыях «проза» і «паэзія» сталі, адпаведна, Аляксей Палачанскі і Таццяна Нядбай.

Шорт-ліст прэміі быў аб'яўлены напачатку сакавіка. У намінацыі «Проза» туды трапілі кнігі апавяданняў Віталя Воранава «Шэптам», Аляксея Палачанскага «Мой цвік», а таксама выданне Рамана Свечнікава з першай часткай дзённікаў падарожніка «Рома едзе», якія звярнулі на сябе ўвагу інтэрнаўтаў.

Зала літаратурнага музея Максіма Багдановіча аказалася поўнасцю занятая прысутнымі. Пасля прамовы-адкрыцця прэміі ад Андрэя Хадановіча, слова ўзяў яе фундатар — мецэнат Павел Бераговіч. Усхвалявана ён паведаміў, што ў гэтым годзе журы працавала ў новым фармаце і ён вельмі рады, што вынікі прэміі абвяшчаюцца менавіта ў музеі беларускага класіка імем якога яна і названа. Таксама Бераговіч узгадаў Генадзя Бураўкіна, Лявона Баршчэўскага, Уладзімера Някляева — усіх тых, «хто працаваў у складзе журы ў мінулыя гады».

Сяброўка журы прэміі загадчыца музея імя Максіма Багдановіча Марына Запартыка прывітала ўсіх удзельнікаў і сказала што ўручэнне такой прэміі ў будынку музея павінна стаць добрай традыцыяй.

Удзельнікаў шорт-ліста прэміі «Дэбют» аб'яўляў Андрэй Хадановіч. Урыўкі са сваіх кніг першымі выйшлі прачытаць празаікі.

Стрымана прачытаў урывак са сваёй кнігі Віталь Воранаў.

Аляксей Палачанскі чытаў свой «Мой цвік» досыць спакойна і разважліва.

Рома Свечнікаў не стаў чытаць урыўкаў, а распавёў кароткія гісторыі з падарожжаў, падзякаваў за вылучэнне ў шорт-ліст і сказаў, што ніхто б з настаўнікаў ніколі не паверыў бы, што ён напіша кнігу, бо вучыўся ён дрэнна.

Пасля выступу Ромы, Андрэй Хадановіч пажадаў яму адкрываць для сябе новы досвед, а найперш досвед размовы на беларускай мове.

Канверт з іменем пераможцы ў намінацыі «Проза» распячатаў Барыс Пятровіч. Там было напісана два словы — Аляксей Палачанскі. Хоць напярэдадні ўсе прагназавалі, што ўганараваны будзе Свечнікаў.

Аляксей Палачанскі атрымаў першую ў сваім жыцці літаратурную прэмію.

За атрыманне прэміі ў намінацыі «Паэзія» змагаліся Таццяна Нядбай са сваёй дэбютнай кнігай «Сірэны спяваюць джаз», Антон Рудак са зборнікам «Верхні горад» і Юлія Цімафеева з «Кнігай памылак».

Пераможцу ў гэтай намінацыі аб'яўлялі Уладзімір Арлоў і Павел Бераговіч. Арлоў казаў, што рашэнне далося вельмі цяжка, бо ўсе кнігі аўтараў-намінантаў «вельмі доўга і асцярожна ўзважваліся». У выніку ў распячатаным канверце было напісана імя Таццяны Нядбай. На ўручэнне дыплома і сертыфіката яна выйшла ўзрушанай і не хавала радаснай усмешкі. Ізноў жа, «гуру» напярэдадні схіляліся да таго, што шанцы Рудака й Цімафеевай вышэйшыя.

Таццяна Нядбай — тонкі лірык, у творах якой спалучаюцца наватарства і традыцыяналізм.

Арганізатары прэміі ў гэтым годзе вырашылі не вызначаць пераможцаў ў намінацыі «Пераклад».

Сёлета ў склад журы ўваходзілі 7 чалавек: Уладзімір Арлоў, Павел Бераговіч, Алена Гушча, Марына Запартыка, Алесь Пашкевіч і лаўрэаты прэміі «Дэбют» 2013 года перакладчыца Кацярына Маціеўская і паэт Уладзь Лянкевіч. 

Кожны з лаўрэатаў прэміі атрымалі прызы ў выглядзе чэкаў на 30 млн беларускіх рублёў ад дабрачыннага фонду «Вяртанне», які зарганізаваў айчынны мецэнат Павал Бераговіч.

Штогадовая прэмія «Дэбют» была заснаваная ў 2010 годзе Беларускім ПЭН-цэнтрам і Саюзам беларускіх пісьменнікаў пры падтрымцы бізнесоўца Паўла Бераговіча. Прэмія ўручаецца аўтарам, якім не больш за 35 гадоў, за найлепшыя дэбютныя творы ў жанрах прозы, паэзіі і мастацкага перакладу. Пераможцамі прэміі ў мінулыя гады ў розных намінацыях былі Віктар Марціновіч, Віталь Рыжкоў, Андрэй Адамовіч, Юлія Шарова, Ганна Янкута, Глеб Лабадзенка, Кацрына Маціеўская і іншыя.

Тэкст і фоты Сяргея Гудзіліна

0
Алесь Манцэвіч / Адказаць
24.03.2015 / 23:52
Віншую пераможцаў! Таццяна, веру, што гэта толькі першая вяршыня. Пакоранымі застануцца і іншыя))
0
Дзядзькiн Самасад / Адказаць
25.03.2015 / 01:12
Жыве Беларусь !
0
цемрашал / Адказаць
25.03.2015 / 01:23
рома свечников - классный парень. авантюрист в хорошем смысле этого слова)) в свои молодые годы практически без денег обьездил весь мир. одна только история чем он в нью-йорке занимался - многого стоит)) нестандартный и незашоренный
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру