17.04.2015 / 19:11

БХД і ТБМ пачалі кампанію па пашырэнні навучання дзяцей у садках на беларускай мове 11

Аргкамітэт па стварэнні партыі «Беларуская хрысціянская дэмакратыя» (БХД) і грамадскае аб'яднанне «Таварыства беларускай мовы імя Францішка Скарыны» (ТБМ) пачалі сумесную кампанію па пашырэнні навучання дзяцей у садках на беларускай мове. Пра гэта было заяўлена 17 красавіка на прэс-канферэнцыі ў Мінску.

Як адзначыла прадстаўнік БХД Марына Хоміч, сёння навучанне дзяцей на беларускай мове сустракаецца дастаткова рэдка. «Мэта нашай кампаніі — павялічыць колькасць дзяцей, якія будуць вучыцца ў садках і школах на беларускай мове. Мы не хочам, каб беларуская мова ўспрымалася ў Беларусі як замежная», — сказала яна.

Хоміч паведаміла, што ініцыятары кампаніі да канца мая будуць збіраць подпісы тых, хто хоча, каб іх дзяцей вучылі ў дзіцячых садках на беларускай мове. «Мы прапаноўваем паведамляць нам аб сваім жаданні накіроўваць дзяцей у беларускамоўныя групы па электроннай пошце belsadok@gmail.com або па тэлефоне (025) 538-40-59. Са свайго боку мы абяцаем юрыдычную падтрымку. У нас ужо падрыхтаваныя заявы на імя начальнікаў упраўленняў адукацыі, спорту і турызму мінскіх адміністрацый з просьбай прыняць дзіця ў групу з беларускай мовай навучання ў дзіцячы садок, а таксама калектыўны зварот з патрабаваннем стварэння ў кожным дзіцячым садку і школе беларускамоўных груп і класаў», — сказала яна.

«Часта бацькі размаўляюць дома з дзіцем па-беларуску. Аднак яны аддаюць дзяцей у садкі і натыкаюцца там на сцяну неразумення. Яны вымушаныя аддаваць дзяцей у рускамоўныя групы, бо іншых проста няма. Таму неабходна, каб грамадства ўзяло пад свой кантроль рэалізацыю канстытуцыйнага права — выбраць беларускую мову навучання», — адзначыла першы намеснік старшыні ТБМ Алена Анісім.

0
Бяльмонцкі Мядзведзь / Адказаць
17.04.2015 / 19:28
А чаму "Малады Фронт", (які перайшоў на стратэгію пашырэння арганізацыі шляхам натуральнага прыросту), да кампаніі не далучыўся? :)
0
літвін / Адказаць
17.04.2015 / 20:42
Трэба не проста размаўляць з дзецьмі "абы размаўляць", а даносіць да дзяцей каштоўныя творы нашае літаратуры і фальклёру. Пачаць варта з традыцыйных народных казак, загадак і г.д. Іх досыць ёсць у зборніках Федароўскага, Шэйна і інш. І дарослым будзе цікава. Трэ' традыцыю перадаваць.
0
Алесь / Адказаць
17.04.2015 / 23:53
У нас тысячы кажуць як трэба рабіць і толькі адзінкі нешта сапраўды робяць...
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру