5 лютага намесьнік кіраўніка грамадзкага аб’яднаньня «Белая Русь» С.Пігараў даслаў адказ старшыні Партыі БНФ Лявону Баршчэўскаму. Юрыдычны адрас «Белай Русі» знаходзіцца ў Доме літаратара.
5 лютага намесьнік кіраўніка грамадзкага аб’яднаньня «Белая Русь» С.Пігараў даслаў адказ старшыні Партыі БНФ Лявону Баршчэўскаму. Ліст кіраўніку «Белай Русі» Аляксандру Радзькову быў накіраваны яшчэ ў першай палове сьнежня, але адказ прыйшоў амаль праз два месяцы.
С.Пігараў піша наступнае:
«Не падзяляючы вашы надуманыя меркаваньні пра нейкую «пагрозу незалежнасьці» нашай краіне і безгрунтоўную перасьцярогу пра «эканамічна-палітычны крызыс», паведамляем наступнае. На ўзьнятыя ў вашым звароце пытаньні неаднаразова даваліся адказы, што шырока адлюстроўваліся ў прэсе і на сёньня ня мае эфэкту навізны. Таму гэта, на нашу думку, не патрабуе дадатковага абмеркаваньня».
У сваім лісьце палітык і пэдагог Лявон Баршчэўскі збольшага закрануў праблемы зьвязаныя з сфэрай адукацыі — ціск на апазыцыйную моладзь у ВНУ, закрыцьцё Гуманітарнага ліцэю імя Якуба Коласа, адсутнасьць беларускамоўнай вышэйшай адукацыі.
Да апошняга часу не было вядома, дзе ж знаходзіцца юрыдычны адрас «Белай Русі». На лісьце, які прыйшоў Баршчэўскаму, адрас адпраўшчыка пазначаны так: «г.Менск, вул.Фрунзэ, 5-205, РГА «Белая Русь». Варта адзначыць, што па гэтым адрасе месьціцца Дом літаратара.
Сам Баршчэўскі пра адказ «Белай Русі» кажа так:
«Мяне зьдзівіла сама хамская манера дасылаць адказ праз паўтара месяца, пасьля таго, як ліст быў накіраваны. Адказ падпісаны абсалютна незнаёмай мне асобай. Мы падпісваліся, як Лявон Баршчэўскі і Вінцук Вячорка — гэтыя людзі ёсьць у энцыкляпэдыях. А хто такі сп.Пігараў, я ня знаю. Па-другое, няма адказу па сутнасьці. Мы прыводзілі мноства фактаў, якіх падручнікаў, контурных карт, вучэбных матэрыялаў на беларускай мове не існуе, як прыцясьняюць студэнтаў, каго выкінулі за палітычныя погляды з ВНУ. І казаць, што недзе ў СМІ на гэтыя пытаньні былі дадзеныя адказы — чыстая бюракратычная адпіска. Гэта паказвае, што арганізацыю «Белая Русь» будуць ствараць на такой вось хамскай аснове».
Цяпер чытаюць
Радыёвядучы расказаў пра ўнутраную кухню АНТ — і пра тое, як ператварыўся ў палітвязня3
Каментары