 Алег Соскін |
Алег Соскін, дырэктар Інстытуту трансфармацыі грамадзтва (Кіеў): Ня думаю, што «Газпром» пойдзе на такі крок. Хутчэй за ўсё працягнуцца перамовы. Магчыма за студзень мы разьлічымся па старой цане, а з лютага пачнём плаціць па новай. У выпадку, калі пасярэднік усё ж застанецца, новая цана складзе недзе $180. Калі Украіна канчаткова адмовіцца да паслугаў пасярэднікаў, то плаціць давядзецца на $100 больш, але не $314, як кажа Расея.
Наша Ніва: Дапусьцім «Газпром» усё‑ткі спыніць пастаўкі, што адбудзецца ў такім разе?
А.С.: Тэхнічна гэта немагчыма. Куды ў такім разе Расея падзене свой газ? Ці мае яна газасховішчы такога аб’ёму? У абход Украіны гэты газ ня пойдзе. Можна зьменшыць аб’ёмы паставак, але Ўкраіна можа ў такім разе адбіраць на свае патрэбы набыты ў Азіі аб’ём газу. Акрамя таго, гэта будзе скандал, якога Эўропа яшчэ не бачыла.
НН: Чаму дагэтуль няма супольнай беларуска‑ўкраінскай стратэгіі дачыненьняў з расейскай нафта‑газавай манаполіяй?
А.С.: Найперш гэта віна нашага кіраўніцтва. І Юшчанкі, і Януковіча, якія проста павінны былі дамовіцца з Аляксандрам Лукашэнкам. У ідэале такую стратэгію трэба было задзейнічаць ад самага пачатку, калі нашыя краіны атрымалі ў выніку распаду СССР незалежнасьць.
НН: Ці магчымыя зьмены ў гэтым кірунку ў кароткай пэрспэктыве?
А.С.: Думаю, што на гэта здольная наша прэм’ер‑міністар Юлія Цімашэнка. Ёй трэба наведацца ў Менск з камандай разумных людзей. Стварыўшы супольны газавы кансорцыюм, мы здолеем аслабіць ціск манаполіі, выставіць ёй свае патрабаваньні і ўмовы, пачынаючы з справядлівага падвышэньня транзытнага тарыфу. Прыклад: возьмем цану газу — за апошні час яна ўзрасла з $40 за тысячу кубамэтраў да $320. Адпаведна тарыф, які сёньня складае $1,7, павінен раўняцца $9.
***
Алег Соскін (нар. у 1954 г.). Скончыў эканамічны факультэт Кіеўскага дзяржаўнага ўнівэрсытэту імя Т. Шаўчэнкі. Стажаваўся пры Нямецкай акадэміі кіраваньня, Эканамічным інстытуце Каларада (ЗША). Ад 1994 г. зьяўляецца дырэктарам Інстытута трансфармацыі грамадзтва.
