Старшыня Беларускай партыі левых «Справядлівы свет» Сяргей Калякін лічыць, што на прэзідэнцкіх выбарах 2015 года «вельмі высокая верагоднасць» фальсіфікацыі вынікаў волевыяўлення грамадзян. Аб гэтым ён заявіў 23 мая ў Мінску, выступаючы на XVIII справаздачна-выбарным з'ездзе партыі.
«Аляксандр Лукашэнка, хоць і з'яўляецца безумоўным фаварытам прэзідэнцкай гонкі, не мае рэальных шансаў па выніках першага тура набраць неабходныя для перамогі больш чым 50% галасоў выбаршчыкаў», — лічыць Калякін.
Палітык адзначыў, што настроі і паводзіны выбаршчыкаў у перыяд выбарчай кампаніі будуць фарміравацца «пад уплывам шэрагу рознанакіраваных фактараў».
Па-першае, гэта сур'ёзнае незадавальненне і расчараванне ўладай у насельніцтва, выкліканае пагаршэннем матэрыяльнага і сацыяльнага становішча, а таксама адсутнасцю ва ўлады зразумелай праграмы пераадолення крызісу. Паводле слоў Калякіна, гэты фактар аб'ектыўна пабуджае людзей да пошуку пазітыўнай альтэрнатывы развіцця і стварае перадумовы для росту палітычнай актыўнасці насельніцтва.
Па-другое, моцны ўплыў на беларусаў працягваюць аказваць падзеі ў суседняй Украіне. «У галовы людзей ўбіваецца думка, што апаненты ўлады, прапаноўваючы перамены, прывядуць краіну да хаосу і грамадзянскай вайны, таму трэба аб'яднацца вакол дзейнай улады, якая забяспечыць мір і стабільнасць. Гэта, безумоўна, хлусня, але яна ўздзейнічае на людзей», — сказаў Калякін.
Па-трэцяе, мяркуе палітык, улады могуць імкнуцца падаўляць волю і палітычную актыўнасць людзей, незаконна выкарыстоўваючы меры сілавога ціску на палітычных апанентаў.
На думку Калякіна, гэтыя фактары неабходна ўлічваць, прымаючы рашэнне аб фармаце ўдзелу партыі ў сёлетняй выбарчай кампаніі.
