Панарама Шанхая.
Паводле падлікаў Міжнароднага валютнага фонду, летась кітайская эканоміка стала самай вялікай у свеце, абышоўшы ЗША. Азіяцкая краіна з насельніцтвам 1,36 мільярда мае гіганцкі патэнцыял, і гэтым спрабуе скарыстацца Беларусь.
Па словах міністра эканомікі Уладзіміра Зіноўскага, Кітай выдзеліць Беларусі льготны крэдыт памерам $3 мільярды, яшчэ $4 мільярды атрымаюць беларускія банкі для фінансавання бізнэс-праектаў. Большасць кітайскіх крэдытаў — «звязаныя»: яны прадугледжваюць, што ў Беларусь прыедуць на працу тамтэйшыя работнікі.
У нашай краіне кітайцы займаюцца адразу некалькі буйнымі праектамі. Азіяцкія будаўнікі ў Мінску зарабляюць $1000—1500 у залежнасці ад аб’ёму выкананай працы.
На колькі гэта адрозніваецца ад заробкаў у іх на радзіме? У Кітаі прынята называць гадавы заробак, а не месячны, як у нас. Паводле дадзеных Нацыянальнага бюро статыстыкі, у 2014 годзе сярэдні заробак у краіне вырас да $740 на месяц. Сфера працы істотна ўплывае на даходы. Заробак вагаўся ад $355 у сельскай гаспадарцы да $1370 — у інфармацыйных тэхналогіях.
«Самае складанае для кітайца — гэта знайсці працу, бо свабодных месцаў заўсёды менш, чым ахвотных. Людзі без адукацыі гатовыя працаваць па 10—12 гадзін на дзень за $200—300», — расказвае 25-гадовы Аляксей, які вучыцца ў Шанхаі.
Афіцыйны ўзровень беспрацоўя складае 4%. Гэта тыя, хто стаіць на дзяржаўным уліку. Паводле незалежных ацэнак, рэальная лічба можа дасягаць 20% — гэта больш за 200 мільёнаў людзей без працы. Мінімальны заробак залежыць ад рэгіёна. Напрыклад, у самай беднай правінцыі, Хэйлунцзян (Прыамур’е), якая знаходзіцца на мяжы з Расіяй, мясцовыя ўлады гарантуюць работнікам $180 штомесяц.
«У вялікіх гарадах узровень заробкаў іншы. У Шанхаі ці Пекіне кваліфікаванаму работніку можна разлічваць на $1000—1500, — працягвае Аляксей. — Праўда, шмат з’ядае арэнда кватэры, бо ў мегаполісах замежнікі з высокімі даходамі «разагналі» цэны на нерухомасць. Апошнія месяцы лічбы змяншаюцца, але ўсё адно знайсці варыянт аднапакаёўкі ў цэнтры танней за $500 маларэальна. У спальных раёнах — магчыма, але тады будзеш бясконца стаяць у дарожных заторах. У Шанхаі ўжо жыве 25 мільёнаў чалавек, гэта бясконцая чалавечая плынь».
Сярэдні заробак у Беларусі — $452
Сярэдні заробак «бруднымі» ў Беларусі ў красавіку склаў 6,54 мільёна рублёў. За месяц кожны беларус пабагацеў на 52 тысячы рублёў. У Мінску заробкі тым часам дасягнулі 8,8 мільёна, гэта $608. У Расіі пасля ўмацавання нацыянальнай валюты сярэдні заробак вырас да $620.
