31.05.2015 / 13:48

Больш за 2000 католікаў удзельнічалі ў працэсіі ў цэнтры Мінска ФОТЫ абноўлена 16

Фоты Уладзя Грыдзіна, Svaboda.org.

Больш за дзве тысячы католікаў удзельнічаюць у працэсіі Божага Цела, якая праходзіць 31 мая на цэнтральных вуліцах Мінска. Прапануем Вашай увазе фоты Уладзя Грыдзіна са Svaboda.org.

Працэсія Божага цела традыцыйна праводзіцца ў гонар свята Цела і Крыві Хрыстовых, якое сёлета выпадае на 4 чэрвеня.

Рэлігійнае дзеянне пачалося ранішнім набажэнствам каля касцёла Найсвяцейшай Тройцы (Святога Роха) на вуліцы Залатая Горка. Перад пачаткам набажэнства мітрапаліт Мінска-Магілёўскі арцыбіскуп Тадэвуш Кандрусевіч павіншаваў аднаверцаў і адзначыў, што «ў чарговы раз Езус Хрыстус дазваляе публічна спавядаць сваю веру» мінчанам.

«Сёння, молячыся ў сваіх інтэнцыях, молячыся ў інтэнцыі нашага касцёла ў Беларусі, нашай Мінска-Магілёўскай дыяцэзіі, таксама памолімся, каб еўхарыстычны Езус памножыў нашы сілы ў спавяданні веры ў Святую Тройцу — Бога адзінага, але ў трох асобах, — сказаў ён. — Бога-сына, які выратаваў нас, Бога-бацькі, які ў сваёй любові паслаў сына на змялю, і Бога — Святога духа, які аб'ядноўвае нас, каб мы як адзінае містычнае цела Езуса Хрыстуса на гэтай зямлі сцвярджалі Бога, які з'яўляецца нашым жыццёвым шляхам».

Першае набажэнства ўзначаліў апостальскі нунцый у Беларусі арцыбіскуп Клаўдыя Гуджэроці. Пасол Ватыкана чытаў тэкст на беларускай мове.

Пасля імшы каталіцкая паства Мінска рушылася па праспекце Незалежнасці, дзе былі спецыяльна ўстаноўлены алтары. За гэтымі алтарамі святары чытаюць урыўкі з Евангелля і пропаведзі. Вернікі ідуць па тратуарах, калону суправаджаюць аўтамабілі ДАІ, супрацоўнікі якой перыядычна прыпыняюць рух транспарту на праспекце, каб удзельнікі працэсіі змаглі прайсці праз участкі праезнай часткі.

Першы алтар размешчаны на плошчы Перамогі каля аднайменнага абеліска, другі — на Кастрычніцкай плошчы, трэці — перад касцёлам Святых Сымона і Алены (Чырвоны касцёл) на плошчы Незалежнасці.

Маршрут замыкае чацвёрты алтар каля архікафедральнага касцёла Найсвяцейшай Панны Марыі на плошчы Свабоды.

0
ок / Адказаць
31.05.2015 / 14:27
очень смешно, 2 тысячі, ехал відел, вся уліца Інтернаціональтная, это далеко не 2 тысячі.
0
n / Адказаць
31.05.2015 / 15:20
"спавядаць сваю веру" ці не "вызнаваць"?
0
туш / Адказаць
31.05.2015 / 16:24
Прыгожа
Паказаць усе каментары/ 16 /
Каб пакінуць каментар, калі ласка, актывуйце JavaScript у наладах свайго браўзеру