Указ № 235 «Аб сацыяльна-эканамічным развіцці паўднёва-ўсходняга рэгіёна Магілёўскай вобласці» падпісаў 8 чэрвеня Аляксандр Лукашэнка.
Паводле звестак прэс-службы прэзідэнта, дакумент прыняты «ў мэтах устойлівага развіцця Клімавіцкага, Касцюковіцкага, Краснапольскага, Крычаўскага, Слаўгарадскага, Хоцімскага і Чэрыкаўскага раёнаў». Для гэтага ўказ прадугледжвае стварэнне «неабходных умоў» і даванне «некаторых прэферэнцый».
Фізічным асобам даецца льгота па выплаце падаходнага падатку. Устанаўліваецца стаўка ў памеры 10% з даходаў у выглядзе аплаты працы, атрыманых па працоўных дагаворах (кантрактах) ад арганізацый і індывідуальных прадпрымальнікаў, якія зарэгістраваныя на паўднёвым усходзе Магілёўскай вобласці з 1 ліпеня 2015 года па 31 снежня 2020 года і займаюцца тут вытворчасцю тавараў (выкананнем работ, аказаннем паслуг) на працягу сямі гадоў з пачатку такой дзейнасці.
Наймальнікам і камерцыйным арганізацыям, якія зарэгістраваныя на тэрыторыі паўднёва-ўсходніх раёнаў Магілёўскай вобласці з 1 ліпеня 2015 года па 31 снежня 2020 года і на працягу сямі гадоў займаюцца тут вытворчасцю тавараў (выкананнем работ, аказаннем паслуг), указам прадугледжаныя льготы па абавязковых страхавых узносах па страхаванні выпадкаў дасягнення пенсійнага ўзросту, інваліднасці і страты кармільца (пенсійнае страхаванне) у бюджэт дзяржаўнага пазабюджэтнага Фонду сацыяльнай абароны насельніцтва. Такія страхавыя ўзносы ўстанаўліваюцца ў памеры 24%.
Грамадзяне, якія будуць будаваць (рэканструяваць) або набываць жылыя памяшканні ў населеных пунктах паўднёва-ўсходніх раёнаў Магілёўскай вобласці, змогуць атрымліваць на гэта льготныя крэдыты тэрмінам да 20 гадоў пад 1% гадавых. Пры гэтым неабходна ажыццяўляць працоўную дзейнасць на тэрыторыі рэгіёна не менш як 10 гадоў з моманту атрымання такіх крэдытаў.
Указам таксама прадугледжана, што Магілёўскі абласны савет дэпутатаў да 1 жніўня 2015 года зацвердзіць праграму сацыяльна-эканамічнага развіцця паўднёва-ўсходняга рэгіёна Магілёўскай вобласці на перыяд да 2020 года, распрацаваную Магілёўскім аблвыканкамам ў мэтах выканання даручэння Лукашэнкі. Дакументам запланаваныя мерапрыемствы па стварэнні новых і павышэнні эфектыўнасці дзейных вытворчасцяў ва ўсіх галінах эканомікі, у тым ліку арыентаваных на перапрацоўку мясцовых прыродных рэсурсаў і сельскагаспадарчай сыравіны. Агульны аб'ём фінансавання мерапрыемстваў праграмы складае 2 трлн 520,8 млрд рублёў.
