Старшыня КДБ Валерый Вакульчык прызнаў, што па справе «Мотавела» затрыманыя шасцёра чалавек. Сярод іх – бізнэсмен Аляксандр Мураўёў, які прадстаўляў аўстрыйскую кампанію ATEC.
Аўстрыйцы сталі ўласнікам завода ў жніўні 2007 года, атрымаўшы 99,72% за $7,3 мільёна. Інвестар абавязаўся ўкласці ў развіццё прадпрыемства $20 мільёнаў.
Якія фінансавыя паказчыкі дэманстравала «Мотавела» падчас знаходжання ва ўласнасці Аляксандра Мураўёва?
Паводле дадзеных Міністэрства фінансаў, за 2007-2014 гады, «Мотавела» атрымала чыстых стратаў $16,4 мільёна. Вытворчасць прадукцыі давала невялікі плюс, але шматмільённыя інвестыцыі абцяжарвалі фінансавыя справаздачы завода.
Што змянілася ў працы завода кардынальна, дык гэта колькасць работнікаў. Па стане на 2007 год, калі прыйшоў Мураўёў, на «Мотавела» працавала 2500 чалавек. У выніку аптымізацыі вытворчасці лічба штогод змяншалася і летась апусцілася да 179 чалавек. Апошнія два гады завод паказваў станоўчыя фінансавыя вынікі.
Аднак скарачэнне работнікаў супярэчыць дзяржаўнай палітыцы. «Агульныя рынкавыя тэндэнцыі кажуць пра тое, што калі ёсць перавытворчасць, трэба гэту вытворчасць згортваць, людзей выкідваць на вуліцу, шукаць нейкія новыя выхады з сітуацыі. Гэта сусветная тэндэнцыя, але мы не ідзем па гэтым шляху. Прэзідэнтам пастаўлена задача захаваць калектывы», – патлумачыў намеснік старшыні Мінгарвыканкам Ігар Карпенка.
У якасці прыклада ён прывёў буйныя аўтамабільныя заводы: «Дапусцім, МАЗ, МТЗ, там 20 тысяч чалавек працуюць. І вось скарацілася 5 тысяч чалавек, а на якія месцы іх уладкаваць?»
Нагадаем, летась МАЗ і МТЗ атрымалі сумесныя страты амаль $250 мільёнаў.
* * *
Фінансавыя паказчыкі дзейнасці «Мотавела»
| Год | Колькасць работнікаў | Прыбытак |
| 2006 | 2685 | -$2,21 мільёна |
| 2007 | 2500 | -$786 тысяч |
| 2008 | 2005 | -$15,35 мільёна |
| 2009 | 897 | $7,28 мільёна |
| 2010 | 645 | -$1,58 мільёна |
| 2011 | 508 | $27 тысяч |
| 2012 | 465 | -$6,39 мільёна |
| 2013 | 428 | $325 тысяч |
| 2014 | 179 | $110 тысяч |
