Тыдзень таму паведамлялася, што нашэсце вусеняў няпарнага шаўкапрада напалохала жыхароў вёскі Канюхі ў Маладзечанскім раёне.
На наступны дзень пасля паведамленняў на месца выехалі супрацоўнікі раённага аддзелу па надзвычайных сітуацыях. Ратавальнікі, з дапамогай аўтавышак і бензапілаў, спілавалі аб'едзеныя дрэвы і ачагі з коканамі.
Дзякуючы намаганням супрацоўнікаў МНС сітуацыя не выйшла з-пад кантролю і засталася лакальнай праблемай для мясцовых жыхароў і іх гаспадарак. У пасёлку Беразінскі, што месціцца побач з Канюхамі, жыхары пагадзіліся на санапрацоўку раслін і дрэваў, каб спыніць наступства шаўкапрада.
Няпарны шаўкапрад — гэта не прышлы монстр, а звыклы для Беларусі від. Не трэба яго блытаць з тутавым шаўкапрадам, які разводзяць для вырабу шоўку. Але калі раней няпарны шаўкапрад сустракаўся найбольш на поўдні і лакальна, то цяпер міграваў і стаў імкліва размнажацца. Прычына гэтага сёлета — цёплыя, сухія зіма і вясна гэтага года. Спыніць распаўсюд яго можа дажджыстае надвор'е, якое замінае параванню матылькоў шаўкапрадаў і прыводзіць да адкладання неаплодненых яек.
