 Аляксандар Косінец |
Кошт аплаты за навучанне студэнтаў‑іншаземцаў у Беларусі трэба перагледзець. Такую думку выказаў намеснік прэм’ер‑міністра рэспублікі Аляксандр Косінец 16 лютага на канферэнцыі Міжнароднай асацыяцыі выпускнікоў ВНУ.
«Гэта пытанне не толькі забеспячэння акупнасці адукацыйных паслуг, але і прэстыжу краіны», — лічыць віцэ‑прэм’ер.
Самая прэстыжная адукацыя — медыцынская — у Оксфардзе каштуе амаль $45 тыс., юрыдычныя, эканамічныя, будаўнічыя спецыяльнасці — амаль $20 тыс. У Беларусі ж падрыхтоўка спецыяліста каштуе ад $2 да $3 тыс.
«Мы не можам даваць парады замежным грамадзянам, як лепш афармляць дакументы на навучанне — асабіста або праз фірму‑пасрэдніка, разам з тым мы выступаем за празрыстую і сумленную эканоміку ў пытаннях падрыхтоўкі кадраў», — дадаў Аляксандр Косінец.
У Беларусі дзейнасць у сферы прадастаўлення платных адукацыйных паслуг замежным грамадзянам ажыццяўляе 51 установа адукацыі. Аляксандр Косінец паведаміў удзельнікам канферэнцыі, што ў рэспубліцы зацверджана Канцэпцыя развіцця экспарту адукацыйных паслуг у рамках супрацоўніцтва Беларусі з замежнымі дзяржавамі. У ёй, у прыватнасці, прадугледжваецца да 2010 года павялічыць экспарт адукацыйных паслуг у 1,6 раза адносна 2005 года, што складзе, паводле папярэдніх ацэнак, $7,11 млн. Развіццё гэтага напрамку прызначана стаць важным складальнікам знешнеэканамічнай дзейнасці краіны. Рэалізацыя канцэпцыі будзе садзейнічаць прыцягненню замежных грамадзян на вучобу ў Беларусь, пашырэнню супрацоўніцтва з замежнымі грамадзянамі — выпускнікамі ўстаноў адукацыі ў інтарэсах экспартаарыентаваных галін вытворчасці.
