Фёдар Лісіца, фота Сяргея Гудзіліна.
Фёдар Лісіца, былы першы намеснік міністра лясной гаспадаркі, правядзе ў калоніі ўзмоцненага рэжыму 5 гадоў. У яго канфіскуюць маёмасць. Ён павінен сплаціць 1 134 754 400 рублёў нанесенай шкоды навакольнаму асяроддзю і 56 737 700 рублёў дзяржпошліны. Лісіцу таксама забаронена займаць пасады, звязаныя з арганізацыйна-распарадчымі абавязкамі, на 5 гадоў.
Яго прызналі вінаватым у незаконным будаўніцтве катэджа ў Салігорскім раёне і шэрагу незаконных рашэнняў на пасадзе дырэктара Старобінскага лясгаса. Два эпізоды тычыліся працы непасрэдна ў міністэрстве.
Крымінальную справу супраць Лісіцы завялі 9 красавіка 2014. За пару дзён да гэтага знялі з пасады. Падставай сталі вынікі праверкі, якую праводзілі КДБ, МУС і КДК. Чыноўніка абвінавацілі ў злоўжыванні ўладай і службовымі паўнамоцтвамі. Паводле следства, Лісіца незаконна набыў зямельны ўчастак, пабудаваў і прыватызаваў жылы дом, нямэтава выкарыстоўваў бюджэтныя сродкі.
Каля вёскі Яскавічы Салігорскага раёна ён пабудаваў катэдж на 294 м2. Але аказалася, што зямля тая знаходзіцца ў водаахоўнай зоне і адносіцца да ляснога фонду. І будавацца на ёй было нельга. Ужо ў 2005, калі Лісіца быў дырэктарам Старобінскага лясгаса, свой участак ён незаконна вывеў з ляснога фонду, каб легалізаваць. А дом зарэгістраваў на жонку. Цяпер катэдж належыць ужо былой жонцы Лісіцы і знаходзіцца пад арыштам. Калі цягам месяца вялізная сума роднымі былога чыноўніка не будзе сплачана, то гэты катэдж канфіскуюць у прыбытак дзяржавы.
Яшчэ адзін эпізод тычыўся другога катэджа ў в. Тычыны. У 2005—2010, па версіі абвінавачання, Лісіца даў загад выдзеліць участак пад будаўніцтва ведамаснага жытла. Аднак пасля будаўніцтва дома яго не ўвялі ў эксплуатацыю як службовае жытло, каб можна было прыватызаваць. Прычым дом на 252 м2 пабудаваў лясгас, якім кіраваў Лісіца. Дырэктар спачатку засяліўся, а пасля стаў у чаргу як чалавек, які мае па трэбу ў паляпшэнні жыллёвых умоў. І прыватызаваў дом. Але яшчэ падчас суда пракурор адмовіўся ад гэтага эпізода, палічыўшы яго законным. Суддзя яго падтрымаў — Лісіца апраўданы.
Калі Лісіцу перавялі ў Мінск, у 2010, ён папрасіў у міністра лясной гаспадаркі выдзяліць службовае жытло. Яму прапанавалі двухузроўневую кватэру ў Ждановічах (111 м2 ). За кошт інавацыйнага фонду зрабілі рамонт, абставілі мэбляй. І тады Фёдар Лісіца звярнуўся з просьбай дазволіць прыватызаваць жытло як асобе, якая мае патрэбу ў паляпшэнні жыллёвых умоў. Але выявілася, што рамантаваць кватэру за сродкі інвестфонду незаконна. А такое распараджэнне, паводле суда, аддаваў сам Лісіца.
Былога намесніка міністра таксама абвінавацілі ў тым, што ў 2012, пакуль ішоў рамонт кватэры ў Ждановічах, пражываў у нумары «люкс» ведамаснай гасцініцы без аплаты.
Фёдар Лісіца ўсе абвінавачанні адкінуў. Яго бараніў нават міністр лясной гаспадаркі Міхаіл Амельяновіч, які праходзіў па справе сведкам.
«Найпрыстойнейшы чалавек і кіраўнік», — ахарактарызаваў былога падначаленага міністр.
