Міністэрства інфармацыі просіць прыбраць з сайта мат і абразы. Таму з гэтага моманту на сайце аб'яўляецца нармалізацыя каментароў, паведамляе выданне, якое цяпер знаходзіцца па адрасе kyky.io.
Постмадэрацыя захоўваецца, але мацюкальныя логі будуць выдаляцца. А абразлівыя будуць ацэньвацца мадэратарамі суб'ектыўна.
22 чэрвеня дырэктар сайта Дар'я Мацявіна і рэдактар Павел Свярдлоў сустрэліся ў Міністэрстве інфармацыі з першым намеснікам міністра Ігарам Луцкім і намеснікам начальніка ўпраўлення прававой і кадравай работы Юрыем Бябешкам.
Ведамства гатова выдаць загад аб аднаўленні доступу да KYKY.org, але чыноўнікі хочуць пераканацца, што з KYKY.org выдаленыя чатыры артыкулы, да якіх прад'явіў прэтэнзіі Мінінфарм і 18 чэрвеня абмежаваў доступ да сайта.
Таксама Юрый Бябешка патлумачыў, чаму Мінінфарм не даў сайту папярэджання, а адразу абмежаваў доступ. Паводле яго слоў, папярэджанне можа атрымаць сайт, размешчаны ў даменнай зоне.by. Паколькі іх дамен -.org, то адзінай даступнай мерай стала блакіроўка.
Рэдакцыя спадзяецца аднавіць доступ да KYKY.org ў найбліжэйшы час.
