Генпракуратура РФ пачала праверку законнасці рашэння Дзяржсавета СССР аб прызнанні незалежнасці краін Прыбалтыкі ў 1991 годзе.
Крыніца агенцтва «Інтэрфакс» паведаміла, што праверка праводзіцца паводле дэпутацкага запыту. Хто менавіта з дэпутатаў падаў запыт, не ўдакладняецца.
«Юрыдычна рашэнне аб прызнанні незалежнасці краін Балтыі недасканала ў сувязі з тым, што яно прымалася неканстытуцыйным органам», — заявіў суразмоўца агенцтва.
Пры гэтым ён адзначыў, што заключэнне пракуратуры павінна быць узважаным, бо пры прыняцці такіх рашэнняў неабходна «ўлічваць не толькі прававы, але і палітычны аспект».
«Прызнаючы незаконнымі тыя ці іншыя лёсавызначальныя рашэнні, можна зайсці занадта далёка — аж да праблемы легітымнасці стварэння СССР і іншых дзяржаў», — адзначыла крыніца.
Дзяржаўная рада СССР прызнала незалежнасць Латвіі, Літвы і Эстоніі 6 верасня 1991 года, на першым жа сваім пасяджэнні. Дзяржрада была ўтвораная днём раней, у яе ўвайшлі прэзідэнт СССР і кіраўнікі саюзных рэспублік.