Літва не павінна ўвязвацца ў дыскусіі і звяртаць вялікую ўвагу на пачатае расійскімі пракурорамі расследаванне законнасці незалежнасці Балтыйскіх краін, заявіў першы кіраўнік Літвы.
Паводле яго слоў, такім крокам Масква спрабуе справакаваць спрэчку.
«Яны зноў спрабуюць нас справакаваць на нейкую спрэчку. Нашы палітыкі, члены Cейма маглі б звярнуцца ў літоўскую пракуратуру з запытам аб законнасці Расіі. Паколькі Расія хутчэй за ўсё незаконная — яна зрынула цара, забіла яго з дзецьмі, дык якая ж гэта дзяржава?» — сказаў Вітаўтас Ландсбергіс.
Так былы старшыня Вярхоўнай Рады Літвы адказаў на пытанне аб паведамленні расійскіх СМІ пра тое, што Генпракуратура Расіі пачала праверку, ці было законным рашэнне Дзяржрады ССР ад 1991 прызнаць незалежнасць Балтыйскіх краін.
«Чаму цяпер? Таму, што няма чым заняцца, або ў іх ёсць нейкі план. Заўсёды яны правяраюць нашу ўразлівасць або сталасць. Калі нам не хапае сталасці, мы пачынаем турбавацца, даказваць, што мы маем рацыю, і тады яны атрымліваюць плюс, што пытанне спрэчнае. Нават не трэба звяртаць увагі, тым больш, дыскутаваць», — сказаў В. Ландсбергіс.
