08.07.2015 / 21:48

Серыя твораў беларускіх класікаў ўжо дастаўленая ў кнігарні 10

26 тамоў серыі «Мая беларуская кніга» выдавецтва «Папуры» давезлі да кніжных крам і сеткі OZ.BY. 7 ліпеня адбылася прэзентацыя бюджэтных кніг у мяккай вокладцы кішэннага фармату колеру вады, зямлі, неба і травы.

Серыя ўяўляе сабой зрэз беларускай літаратуры — ад старажытных легенд, народных казак, хрэстаматыйных і малавядомых твораў класікаў да работ сучасных пісьменнікаў. Сярод аўтараў класікі беларускай школьнай праграмы — Янка Купала, Якуб Колас, Максім Гарэцкі, Кузьма Чорны, Максім Багдановіч і Іван Мележ. Ёсць і прадстаўнікі ваеннага пакалення — Іван Шамякін, Алесь Адамовіч, Васіль Быкаў, філалагічнага пакалення — Рыгор Барадулін, Уладзімір Караткевіч.

Складальнікі ўключылі ў серыю і беларускіх аўтараў, якія пісалі не на беларускай мове: Майсея Кульбака, Адама Міцкевіча. Прадстаўленыя таксама кнігі, якія выдаваліся раней, але іх ужо не так проста знайсці ў крамах — гэта творы Андрэя Мрыя, Вячаслава Адамчыка, Саламеі Пільштыновай, Францішка Аляхновіча, Яна Баршчэўскага.

У серыі прадстаўленыя творы на шырокі чытацкі густ: для аматараў гістарычнай літаратуры — Кастусь Тарасаў «Пагоня на Грунвальд», для дзяцей — казкі «Сіняя світа» і твор «Палескія Рабінзоны» Янкі Маўра.

Пры гэтым выдавецтва выканала аўтарскія правы і супрацоўнічала з нашчадкамі пісьменнікаў.

«Мы вырашылі выдаць класіку на хвалі цікавасці да беларускай мовы, — сказаў дырэктар выдавецтва. — На шчасце, мы знаёмыя са складальнікамі, якія стварылі добрую серыю, што адпавядае патрэбам чытачоў. Для нас гэта своеасаблівы эксперымент — ці будуць карыстацца попытам такія кнігі. Калі серыя прадасца, мы гатовыя выдаць іншых аўтараў і павялічыць тыражы цяперашніх выданняў. Цяпер разглядаем ідэю выдаць гэтую серыю і ў цвёрдай вокладцы. Ад бібліятэк і людзей, якія хацелі б падарыць серыю сябрам, ужо паступілі такія просьбы. Але гэта зробіць кнігу даражэйшай, таму мы абдумваем гэты варыянт».

Сумарны тыраж кніг — 60 тысяч асобнікаў, кожная кніга па 2-2,5 тысячы штук.

Над праектам на працягу двух гадоў працавалі гісторык, паэт, віцэ-прэзідэнт Беларускага ПЭН-цэнтра Уладзімір Арлоў, пісьменнік і літаратуразнаўца, кандыдат філалагічных навук Пятро Васючэнка, філолаг і грамадскі дзеяч Лявон Баршчэўскі, літаратуразнаўца, пісьменнік, доктар філалагічных навук Міхась Тычына і пісьменнік, перакладчык, выдавец Уладзімір Сіўчыкаў.

Па словах складальнікаў, кожны з іх склаў персанальны спіс 30 найлепшых беларускіх кніг, і потым усё вынікі супаставілі. Так і нарадзілася серыя. Прычым адзін з укладальнікаў Уладзімір Арлоў доўгія гады складае ўласную «залатую» паліцу беларускай класікі, куды ўваходзяць кнігі, якія ён прачытаў яшчэ ў юнацтве. Паводле яго слоў, цяперашняя серыя цесна пераклікаецца з адабранай ім хатняй бібліятэкай.

Мэта праекта — зрабіць айчынных пісьменнікаў бліжэйшымі да беларусаў, а чытачам даць шанец зноўку прачытаць і ацаніць творы, прадстаўленыя сярэдняй школай не ў поўным аб'ёме, а часам «пройдзеныя» толькі фармальна.

0
М.Рубін / Адказаць
08.07.2015 / 21:55
Набыў Кульбака ўжо, шыкоўная рэч!:) Кошт прыемны, але трэба ўмець чытаць покет-букі так, каб гэта было не на адзін раз:)
0
гарадзенка / Адказаць
08.07.2015 / 22:24
У Гародні таксама ёсць у продажы. Я нарэшце набыла кнігу Адама Міцкевіча "Пан Тадэвуш", вельмі добры пераклад. І ўвогуле мне вельмі падабаецца гэтая серыя кніг, вельмі зручна і па кошту проста выдатна. Удзячнасць выдавецтву і арганізатарам, задумаўшым такую серыю кніг.
0
інжынер зь менску / Адказаць
08.07.2015 / 22:46
дарэчы яшчэ на тым тыдне набыў пана тадэвуша перакладу бітэля зьвярнуў увагу як знаўца на вельмі цудоўны !!! падбор класікі пашкадаваў што ўсё ўжо маю але на пана тадэвуша нестрымаўся бо вельмі зручны фармат!! 100 балаў за густоўны і важкі праект
Паказаць усе каментары/ 10 /
Каб пакінуць каментар, калі ласка, актывуйце JavaScript у наладах свайго браўзеру