Зніклая ў канцы чэрвеня маладая магіляўчанка знойдзеная павешанай у лесе непадалёк ад аўтадарогі са Шклова ў Магілёў.
Пра гэта паведамілі ў аддзяленні інфармацыі і грамадскіх сувязей УУС аблвыканкама.
Па словах начальніка ўпраўлення крымінальнага вышуку УУС аблвыканкама Міхаіла Гагіева, 5 ліпеня ў Кастрычніцкі РАУС Магілёва па дапамогу ва ўсталяванні месцазнаходжання дачкі звярнулася маці.
Яна распавяла, што дачка з'ехала 26 чэрвеня ў Шклоў да сяброўкі, а 29 чэрвеня развіталася з ёй і мела намер вярнуцца ў Магілёў. Пасля гэтага сувязь з ёй была згублена, а мабільны нумар знаходзіўся па-за зонай доступу.
У ходзе праведзеных аператыўна-вышуковых мерапрыемстваў супрацоўнікамі крымінальнага вышуку Кастрычніцкага і Шклоўскага РАУС, УУР УУС было ўсталявана і апытана кола сваякоў і знаёмых дзяўчыны, праведзены агляд па месцы жыхарства. Яна была праверана па ўліках устаноў аховы здароўя і бюро рэгістрацыі няшчасных выпадкаў УУС. На вышук магіляўчанкі быў арыентаваны Шклоўскі РАУС, а таксама тэрытарыяльныя АУС Магілёўскай вобласці.
Вечарам 8 ліпеня мужчына выпадкова знайшоў дзяўчыну павешанай на дрэве ў лесапасадцы. Пра гэта ён паведаміў па тэлефоне 102.
Па факце смерці 28-гадовай магіляўчанкі Шклоўскім раённым аддзелам Следчага камітэта праводзіцца праверка, падчас якой будуць вывучаны і ўстаноўлены абставіны і прычыны выпадку, праведзены шэраг экспертыз, у тым ліку судова-медыцынская. Па выніках будзе прынята працэсуальнае рашэнне.