У Пухавіцкім раёне двое падлеткаў па просьбе 73-гадовай пенсіянеркі скралі з поля 5 рулонаў нарыхтаванага сена.
У Пухавіцкі РАУС звярнуўся дырэктар мясцовага сельскагаспадарчага прадпрыемства ААТ «Племзавод «Індустрыя», які паведаміў, што невядомыя выкралі ўначы з поля пяць рулонаў сена, вагой каля паўтонны кожны. Супрацоўнікі крымінальнага вышуку апыталі жыхароў суседняй вёскі. У адным з падворкаў аператыўнікі заўважылі пажылую жанчыну, якая карміла свежым сенам свайго каня.
На ўсе пытанні пра незнаёмцаў, якія маглі б выкрасці рулоны з поля, яна спакойна адказвала, што нічога не ведае. Агляд гаспадарчых пабудоваў чакана паказаў, што яшчэ чатыры выкрадзеныя рулоны знаходзяцца там жа.
Як выявілася, напярэдадні 73-гадовая пенсіянерка папрасіла дваіх суседскіх падлеткаў (15-і і 16-і гадоў) дапамагчы з нарыхтоўкай кармоў для жывёлы, а менавіта прыкаціць з суседняга поля некалькі рулонаў сена. «Добрасумленныя» школьнікі не адмовілі бабулі і ноччу прыкацілі ёй 5 велізарных цыліндраў. За свае паслугі падлеткі не папрасілі ніякай аплаты.
Заведзеная крымінальная справа па артыкуле «Крадзеж». Сена вернута законнаму ўладальніку.
