24.07.2015 / 17:52

Улады Аўстраліі заб’юць два мільёны катоў 7

Брыджыт Бардо кажа, што гэта не дапаможа.

Фота: Shawn Fennell via Tumblr

Аўстралійскі ўрад вырашыў знішчыць частку дзікіх катоў, паведамляе Washington Post. Да 2020 года плануецца забіць 2 млн жывёл. Гэтыя планы асудзіла актрыса і абаронца жывёл Брыджыт Бардо, перадае Yahoo.

«[Каты] гэта цунамі гвалту і смерці для мясцовых аўстралійскіх відаў», — заявіў міністр навакольнага асяроддзя Аўстраліі Грэг Хант. Дзікія каты штогод забіваюць 75 млн іншых жывёл.

Звыклыя нам жывёлы яшчэ нядаўна не насялялі Аўстралію, першыя хатнія каты з’явіліся там 200 год таму. З тых часоў папуляцыя дасягнула 20 млн толькі дзікіх катоў. Клімат і мноства ежы спрыяюць іх размнажэнню, а харчуюцца яны не толькі мышамі ды пацукамі, але і рэдкімі відамі. Гэта ўжо прывяло да знікнення 29 відаў аўстралійскіх жывёл, пад пагрозай яшчэ 40 відаў жывёл і 30 — раслін.

На пяцігадовы план па знішчэнні катоў улады збіраюцца выдаткаваць 750 тысяч даляраў. Супраць катоў Аўстралія плануе ўжыць «гуманныя» спосабы забойства: напрыклад, атруту, ад якой каты проста засынаюць назаўсёды. Таксама плануецца стэрылізаваць і перасяліць частку катоў.

Абаронца правоў жывёл сцвярджае, што грошы, выдаткаваныя на забойствы, было бы эфектыўней патраціць на стэрылізацыю. «Жывёльны генацыд гэта негуманна і глупа, — напісала яна ў адкрытым лісце. — У дадатак да таго, што гэта жорстка, забойствы катоў абсалютна бяссэнсоўныя, бо тыя, што выжывуць, працягнуць размнажацца».

Яе сумневы ў эфектыўнасці забойстваў падтрымлівае, грунтуючыся на былым досведзе, арганізацыя «Людзі за этычнае абыходжанне з жывёламі» (PETA). Спецыялістаў турбуе і тое, што атрута для дзікіх катоў заб’е і хатніх катоў у прыгарадах, і іншых жывёл.

Акрамя катоў, Аўстралія раней забівала каал (яны занадта хутка пладзяцца і знішчаюць эўкаліптавыя дрэвы ды экасістэмы вакол іх), а таксама планавала частковае знішчэнне сухапутных анабасавых рыб.

Аляксандр Арсёнаў

0
Няхлюй / Адказаць
24.07.2015 / 17:58
Катахвост...
0
Мордехай В. / Адказаць
24.07.2015 / 18:03
Бей катоў - ратуй намбата! Зброя выглядае так: kangaroo meat, chicken fat, and a deadly toxin.
0
птушка / Адказаць
24.07.2015 / 18:49
Перад Аўстраліяй стаіць грандыёзная задача - на працягу наступных 10 гадоў вынішчыць інтрадукаваных некалі ў дзікую прыроду розныя віды звяроў, каб захаваць мясцовую прыроду. Пра гэта заявіў Грэг Хант (Greg Hunt), аўстралійскі міністр навакольнага асяроддзя. Міністр паабяцаў ачысціць краіну-кантынент ад дзічэлых катоў і іншых чужародных інвазійных відаў млекакормячых, ад чаго павінны выйграць найперш мясцовыя віды птушак і іншых жывёл. Неабходна падкрэсліць, што Аўстралія мае найбольшы ў Свеце спіс зніклых відаў звяроў: больш за 10% (30 відаў) абарыгенных млекакормячых зніклі пасля каланізацыі кантыненту еўрапейцамі, прычым каля для 20 з іх галоўнай прычынай знікнення былі менавіта каты. Такія дадзеныя прадставілі эксперты з універсітэту Чарльза Дарвіна. Хант падкрэсліў, што дагэтуль захаваць абарыгенную біяразнастайнасць атрымліваецца не вельмі паспяхова – ажно 749 відаў знаходзяцца ў Спісе Акта па ахове біяразнастайнасці і навакольнага асяроддзя (Environment Protection and Biodiversity Conservation Act), прычым штогод колькасць такіх відаў, на жаль, павялічваецца. Урад прызначыў камісара па пагражаемым відам (Threatened Species Commissioner), які і прадставіць стратэгію барацьбы з інтрадуцэнтамі. Аднак падобныя мэты, пастаўленыя яшчэ ў 1996 годзе, паводле якіх планавалі вынішчыць інтрадуцэнтаў да 2010 году, яўна праваліліся. І цяпер грамадзскасці невядомы канкрэтныя дзеянні, якія павінны радыкальна змяніць сытуацыю да лепшага. Вядома, што здзічэлыя каты і звычайныя лісіцы з’яўляюцца найбольшай пагрозай для захавання мясцовай наземнай фауны хрыбетных жывёл, да іх дадаюцца выпадковыя пажары і іншае знішчэнне прыродных экасістэм. Упершыню завезеныя ў Аўстралію брытанскімі імігрантамі на прыканцы 1700-х гадоў у якасці хатніх пітомцаў, збеглыя каты хутка распаўсюдзіліся па ўсяму кантыненту і цяпер іх колькасць ацэньваецца ў 20 мільёнаў асобін. Тым не менш, прыведзеныя лічбы не з’яўляюцца афіцыйна прынятымі і крытыкі кажуць пра “толькі” прыкладна 8 мільёнаў катоў. Аднак нават такая лічба дазваляе ўявіць страты сярод мясцовай фауны, якія здзяйсняюць гэтыя драпежнікі. Таму не павінны здзіўляць афіцыйныя звесткі пра тое, што менавіта гэты від-інтрадуцэнт ёсць галоўнай пагрозай існаванню на кантыненце як мінімум 35 відаў птушак, 36 відаў звяроў, 7 відаў рэптылій і 3 відаў амфібій. Канкрэтныя метады, якія будуць выкарыстоўвацца для вынішчэння інтрадуцэнтаў-драпежнікаў, пакуль невядомыя. Аднак не так даўно была распрацаваная новая прынада, якая хутчэй за ўсё і будзе выкарыстоўвацца для гэтай мэты. Акрамя гэтага, Урад прызначыць 3,3 мільёны Aus$ на праграму па рэінтрадукцыі тасманійскага дыябла – аднаго з самых харызматычных відаў сумчатых звяроў, колькасць якога хутка і значна змяншаецца ў апошнія гады з-за спецыфічнай хваробы. http://birdwatch.by/news/8176
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру