Дзяржаўныя тэлеканалы штодзень асвятляюць ход перадвыбарнай гонкі. У кадр трапляюць пікеты ўсіх кандыдатаў, але асноўная ўвага надзяляецца падтрымцы Аляксандра Лукашэнкі. Астатніх кандыдатаў пераважна апісваюць нейтральна, згадваючы толькі іх прозвішчы.
Аднак тэлеканал АНТ перайшоў да лабавой атакі. Аўтарская праграма «Как есть» Аляксея Міхальчанкі (у свой час быў у «чорным спісе» Еўрасаюза) была прысвечаная кандыдату ад АГП Анатолю Лябедзьку.
«Словы кіраўніка дзяржавы пра тое, што выбарцам будуць спрабаваць вешаць локшыну на вушы, — багаты палітычны вопыт. Доўга чакаць не давялося. 22 ліпеня іншы прэтэндэнт, Анатоль Лябедзька, адправіўся да прахадной МТЗ», — пачаў вядучы.
фота БелаПАН з таго пікета
Міхальчанка прызнаецца, што сам не прысутнічаў на мерапрыемстве, таму зачытваў цытаты з рэпартажа на Tut.by, дадаючы свае каментары.
Вядучы нагадвае, што на эмблеме АГП намаляваны конь, і надзвычай дасціпна жартуе: «Любы паход Лябедзькі можна назваць «ход канём». 22 ліпеня гэтае няпарнакапытнае занесла на прахадную МТЗ».
Міхальчанка адзначае, што большасць патэнцыйных выбарцаў ніяк не адрэагавала на пікет Лябедзькі: «Ён абяцаў мільён новых працоўных месцаў, а тысячы людзей праходзілі міма».
Што абурыла вядучага, дык гэта фраза лідара АГП пра транснацыянальныя карпарацыі, якія маглі б стварыць працоўныя месцы ў Беларусі. «Чаму з Літвы і Латвіі з'язджаюць у пошуках хоць нейкай працы сотні тысяч чалавек? Там жа найлепшыя ў свеце еўрапейскія суды і законы», — «іранізіраваў» Міхальчанка.
Напрыканцы АНТ цытуе Аляксандра Фядуту, які раіць Лябедзьку і ягонаму пакаленню сыходзіць з палітыкі пасля выбараў.
«Мне асабліва спадабаўся сказ: «Неўзабаве лістоўкі і газеты скончыліся, і Лябедзька стаў даваць інтэрв'ю». Адразу захацелася дапісаць: «А калі скончыліся інтэрв'ю, старшыня АГП узарваў сябе апошняй гранатай», — працягваў «адпальваць» Міхальчанка, удакладніўшы, што пажартаваў.
