09.08.2015 / 11:30

У Зэльве адзначылі 105-я ўгодкі Ларысы Геніюш ФОТА 14

105 гадоў з дня народзінаў выбітнай беларускай паэткі-патрыёткі Ларысы Геніюш адзначылі ў Зэльве. У мясцовай Свята-Троіцкай царкве адбылася памінальная багаслужба, якую ўжо традыцыйна ад некалькіх гадоў праводзяць у памяць пра паэтку.

З Зэльвы паведамляе карэспандэнтка радыё «Рацыя» Яна Запольская: – Каля бюста Ларысы Геніюш, які знаходзіцца непасрэдна пры царкве, вядомы беларускі літаратар, даследчык творчасці паэткі Міхась Скобла прэзентаваў новую кнігу пад назвай «Духу магутныя чары…», якая гэтымі днямі выйшла ў выдавецтве «Лімарыюс». Гэтая кніга сабрала шматлікія архіўныя матэрыялы, якія яшчэ захоўваюцца нават у дамах некаторых мясцовых жыхароў. Таксама выступіла вядомая беларуская гарадзенская паэтка Данута Бічэль, яка распавяла свае ўспаміны пра Ларысу Геніюш, пра той дом, у які яна сюды прыязджала, дзе нашая паэтка жыла разам з мужам Янкам Геніюшам. На мерапрыемстве прысутнічала даволі шмат людзей. Тут прадстаўлены Гародня, Ліда, Слонім, Мастоўшчына, Дзятлаўшчына, шмат мясцовых жыхароў, на жаль, з Менску прыехала нешматлікая група. Варта, напэўна, адзначыць, што на заклік мясцовых актывістаў прыехаць у Зэльву прэтэндэнтаў кандыдатаў на пасаду прэзідэнта, ніхто з іх не з’явіўся. Пры царкве адбылася прэзентацыя кніжак, паэты чыталі вершы, а таксама выступілі барды. Пасля ўдзельнікі імпрэзы паехалі і ўсклалі кветкі на магілу Ларысы і Янкі Геніюшаў на мясцовых зэльвенскіх могілках. Завяршалася ўрачыстасць больш працяглым канцэртам у мясцовасці Беражкі непадалёк Зэльвенскага вадасховішча.

0
Лявон / Адказаць
09.08.2015 / 11:43
Вось сапраудная гераіня БЕЛАРУСІ! Яе творы,словы,мужнасьць-прыклад беларусам і беларускам,як патрэбна жыць,змагацца за Беларусь, любіць і шанаваць беларускую мову і свой цудоуны край! Беларусы кажуць: У ДОБРАЙ СЛАВЫ ШЫРОКІЯ КРЫЛЫ!
0
Душы каларадаў - ратуй бульбу / Адказаць
09.08.2015 / 11:47
Абмінаю ўсю набрыдзь, што вокал, Чалавечы мой блытае лёс. Гляджу ўдаль, не маргнуўшы нат вокам. Розум цемру праніжа наскрозь! Ларыса Геніюш. "Не згінай мяне, я не сагнуся..."
0
Сляза скацілася ў снежні, калі заплакаў летні дождж... / Адказаць
09.08.2015 / 12:15
Рукою чорнай хтось крануўся крылаў, Струн душы — і струны не звіняць. Зноў груганы свабодны лёт спынілі, На шлях свой хіжы звабіць наравяць. Я ад зямелькі крыллем адаб’юся І абміну ў палёце слізкі жах, Злячу душой са сцежак Беларусі На недасяжны, на паднебны шлях. Ніхто не вольны — райце нам не сватаць, Пакутамі скарочваць нашы дні. Свая душа, свае шляхі ў крылатых І праўды свет яснейшы з вышыні. Ларыса Геніюш. ### А гэта маё дакрананне да творчасці Ларысы Геніюш і яе верша "Рукою чорнай хтось крануўся крылаў..." У ВЫШЫНІ Ледзь ад зямелькі крыллем адаб’юся І абміну ў палёце досвіткам святло, Я сёння ж раненька дамоў вярнуся З святла цяплом. Вы пачакайце, родныя, вярнуся Да роднай хаты, роднай Беларусi, У нашы добрыя часы, ў нашы ж дні: Мне вольны свет яснейшы ў вышыні! І не хвалюйцеся – я ўсё ж вярнуся… Вось ад зямелькі крыллем адаб’юся Ды абніму ў палёце вольнае святло.
Паказаць усе каментары/ 14 /
Каб пакінуць каментар, калі ласка, актывуйце JavaScript у наладах свайго браўзеру