Славамір, фота з сацыяльных сетак.
Славамір з кампаніяй адзначаў свой дзень нараджэння 8 жніўня. Хлопцу споўнілася 25 гадоў. Выпівалі. А ўначы разгарэлася сварка.
«Малады чалавек шмат выпіў, у выніку чаго на глебе рэўнасці ўчыніў скандал. У нейкі момант дзяўчына схапілася за нож, якім пашкодзіла хлопцу артэрыю»,
— паведамілі ў абласной міліцыі. Удар прыйшоўся ў жывот. Іншы ўдзельнік застолля выклікаў міліцыю. Праз гадзіну Славамір сканаў у бальніцы.
«Наша Ніва» пагаварыла з сяброўкай маладога чалавека, з якой у яго пачалі завязвацца рамантычныя адносіны. І якія раптоўна абарваліся.
Марына пазнаёмілася са Славамірам у ліпені. Хлопец дадаўся да яе ў сябры ў сацыяльных сетках. Перапісваліся спачатку. А затым сустрэліся.
«Мы пазнаёміліся тыдні тры таму, у нас адразу наладзіліся сяброўскія адносіны. У мяне дзеці ёсць, з мужам мы не жывём. Слава пачаў мне дапамагаць. Я паехала да сяброўкі ў Ліду, ён прапанаваў зайсці. Прыйшоў, мы размаўлялі, пілі чай. Увечары Слава мяне праводзіў на аўтобус».
Марына жыве ў Воранаўскім раёне.
«Ён кожны дзень мне тэлефанаваў — кожныя паўгадзіны мяне набіраў. Нават прызнаўся ў каханні, сказаў, што хоча быць са мной.
8 жніўня я помніла, што мне трэба яго павіншаваць. Я самая першая напісала яму віншаванне. Пасля яшчэ патэлефанавала. Ён прапанаваў назаўтра сустрэцца. Увечары я званіла, ён ужо не адказваў. А затым мне ў сацыяльных сетках прыйшло паведамленне, што ён выдаліў мяне з сяброў. Я нічога не зразумела.
9 жніўня я прыехала ў Ліду, чакала, што ён сам патэлефануе. Ён не набраў. Я адшукала нумар яго брата. І Юра расказаў, што 8 жніўня ўвечары Славік збіраўся адзначыць свой дзень нараджэння. Паехаў да нейкай дзяўчыны, а пасля яны пасварыліся. Што яны не падзялілі, не ведаю. Але яна схапіла нож і пырнула. Яго шпіталізавалі, зрабілі аперацыю, а праз гадзіну ён сканаў. А дзяўчыну адразу забралі ў міліцыю».
13 жніўня адбудзецца пахаванне хлопца.
«Мне патэлефанавала жанчына. Сказала, што мой нумар у Славіка ў тэлефоне падпісаны як «любімый малыш». Сказала, што заўтра пахаванне», — плача Марына.
Здарэнне адбылося 9 жніўня каля 00.30 на кватэры ў 26-гадовай Яні. Яна і схапілася за нож. Вядома, што дзяўчына працуе памочніцай выхавацелькі ў Лідзе.
Крымінальная справа заведзена за наўмыснае нанясенне цяжкага цялеснага пашкоджання, што пацягнула па неасцярожнасці смерць. Дзяўчыне пагражае ад 5 да 15 гадоў калоніі.
